Qasym-Jomart Toqaev úkimettiń keńeıtilgen otyrysynda eldegi turǵyn úı máselesi ýshyǵyp ketkenin málimdedi dep habarlaıdy Qamshy.kz aqparat agenttigi Tengrinews.kz tilshisine silteme jasap.

"Turǵyn úı máselesin siz únemi baqylaýda ustaýyńyz kerek. Turǵyn úı problemasy eń ótkir, ózekti, áleýmettik ekenin túsinýińiz kerek. Sońǵy ýaqytta qanshalyqty asqynǵanyn ózińiz kórip júrsiz. Jalpy alǵanda qalaı sheshý kerektigi týraly jáne jekeleı sheshý joldary týraly usynystar berińiz. Biz belgili bir adamdar tarapynan turǵyn úıge qatysty joǵary talaptar bar dep aıta alamyz. Biraq munymen másele sheshilmeıdi. Munyń bári úkimetke baılanysty, biz bul máseleni qalaı sheshemiz", - dedi Toqaev Indýstrıa jáne ınfraqurylymdyq damý mınıstri Roman Sklárǵa.

Memleket basshysy turǵyn úı máselesi mınıstr men Úkimet tarapynan turaqty baqylaýda bolý kerektigin aıtty. Osyǵan deıin, mınıstr jarty jyldyqtyń qorytyndysy boıynsha 5,7 mıllıon sharshy metr turǵyn úı paıdalanýǵa berilgenin aıtty, bul ótken jylmen salystyrǵanda 98,1 paıyz boldy.  Sklárnyń aıtýynsha, turǵyn úıdi paıdalanýǵa berý ósimi boıynsha Túrkistan, Qyzylorda, Almaty jáne Qostanaı oblystary kósh bastap tur.

Jeke qurylys salýshylardyń belsendiliginiń azaıýyna baılanysty Mańǵystaý oblysy men Nur-sultan qalasynda tómendeý baıqalady. Sonymen qatar, elordada jyldyq kólemniń ótken jyldyń sáıkes kezeńimen salystyrǵanda 16 paıyzǵa tómendeýi boljanady.