Baýyrjan Baıbek aıtys óneri men partıalyq praımerızdi salystyrdy dep jazady Qamshy.kz aqparat agenttigi. Bul týraly «Nur Otan» partıasy Tóraǵasynyń Birinshi orynbasary «Habar» agenttiginiń «Jeti kún» baǵdarlamasyna bergen suhbatynda aıtty.

Suhbat barysynda ol 21 tamyzda ótken Saıası keńestiń keńeıtilgen otyrysynda Elbasy bergen tapsyrmalardyń mańyzy, partıany qaıta jandandyrý jolyndaǵy jańa baǵdarlama jáne partıa jumysynyń aldaǵy baǵyt-baǵdary týraly aıtty.

– Elbasy Saıası keńestiń otyrysynda «Senim. Dıalog. Bolashaqqa nyq qadam – «Nur Otan» partıasynyń 7 serpini» atty jańa baǵdarlamany tanystyryp, bıleýshi partıaǵa naqty tapsyrmalar berdi. Olardyń eń bastysy – partıa jumysyn jandandyrý, – dedi Baýyrjan Baıbek.

Sonymen qatar ol táýelsizdiktiń alǵashqy jyldarynda egemendikti saqtap qalý ońaı bolmaǵanyn, sondaı sátte halyq biraýyzdan Elbasyǵa senim artyp, sonyń arqasynda elimizdiń qıyn jaǵdaılardan qınalmaı ótkenine nazar aýdardy.

– Qazir jaǵdaı jaqsardy. Soǵan baılanysty qoǵamnyń suranysy da ózgerdi. Biz osy suranystarǵa saı bolyp, halyqtyń senimin aqtaý úshin jumys isteımiz. Sondyqtan bizdiń negizgi jańa quralymyz – praımerız, ıaǵnı kez kelgen máseleni ashyq, ádil talqylaý, – degen Baýyrjan Baıbek aldaǵy ýaqytta partıa zaman talaptaryna saı ózgerip, naqty reformalar qolǵa alynatynyn aıtty.

Elbasy anyqtap bergen 7 baǵyt arqyly partıa jumysyn qaıta jandandyrý aıasynda jastarǵa, ásirese, aýyl jastaryna jaǵdaı jasaý, aýyldyq jerlerden jumys oryndaryn ashý, Nur-Sultan, Almaty, Shymkent sıaqty iri qalalarǵa kóship kelip jatqan azamattarǵa qoldaý kórsetý, kóp balaly ana, múmkindigi shekteýli azamattar, basqa da áleýmettik toptarǵa naqty kómek kórsetý, bastaýysh partıa uıymdarynyń jumysyn jetildirý, partıalyq baqylaýdy kúsheıtý sıaqty kóptegen ózekti máseleler boıynsha da jumystar júrgiziledi.

Sondaı-aq Baýyrjan Baıbek búginde partıanyń aldyna qoıylyp otyrǵan talaptarǵa Májilis pen barlyq deńgeıdegi máslıhattardaǵy fraksıalardyń músheleri, nurotandyq mınıstrler men ákimder de saı bolýy kerektigin aıtty.

– Elbasy «Nur Otan»-dy naqty isterdiń partıasy dep únemi aıtyp keledi. Sondyqtan biz bıleýshi partıa retinde eń aldymen ashyq, ádil bolýdy ózimizden talap etemiz. Biz bir-birimizden el úshin naqty ne istegenimizdi suraýymyz kerek. Osyny ár partıa qyzmetkeri sezinýi tıis. Sol sebepti aldaǵy ýaqytta óz qatarymyzdy tazartýǵa basa mán beremiz, – dedi «Nur Otan» partıasy Tóraǵasynyń Birinshi orynbasary.

Sonymen birge ol budan bylaı partıanyń qoǵamdaǵy bar máselelerdi jasyrmaı, ashyq aıtatynyn jetkizdi.

– Eger bir másele oń sheshimin tapsa nemese sońyna deıin jetkizilmese, sonyń bárin halyqqa jarıalap otyramyz. Qazaqta «aýrýyn jasyrǵan ańdamaı óledi» degen sóz bar. Sondyqtan partıa bar kemshilikterdi der kezinde kóterip, aıtý kerek, – dedi Baýyrjan Baıbek.

Suhbat barysynda ol bul iske buqaralyq aqparat quraldary da atsalysyp, halyqqa shyndyqty jetkizý kerektigine toqtaldy.

– Elbasy «Nur Media» holdıńine naqty tapsyrma berdi. Ol jalpy buqaralyq aqparat quraldaryna da qatyty. Otandyq aqparat quraldary shyndyqty aıtýlary kerek. Biraq synnyń destrýktıvti jáne konstrýktıvti degen eki túri bar. Iaǵnı, adam tek synaı bermeı, máseleniń sheshilý jolyn da aıtýy kerek. Sonda ǵana ondaı synnyń halyqqa paıdasy bolady. Al qur sózben esh nársege jete almaımyz, – dedi suhbat berýshi.

Suhbat kezinde partıanyń halyqty masyldyq psıhologıadan aryltyp, eńbek etýge úgitteý isinen de tys qalmaıtyny sóz boldy.

– Elbasy únemi halyqty adal eńbek etýge shaqyryp keledi. Bul – qoǵamda ádildiktiń ornaýyna da úlken áserin tıgizedi. Sondyqtan adam ózi únemi alǵa umtylyp, talpynýy kerek. Kásippen aınalysamyn degenge memleket te qoldaý kórsetip otyr. Partıa da osy iske atsalysyp, túsindirý jumystaryna qatysady. Bizdiń maqsatymyz – halyqqa balyq emes, qarmaq berý, – dedi Baýyrjan Baıbek.

Budan basqa partıa Tóraǵasynyń Birinshi orynbasary aıtys óneri, tól mádenıetimizdi dáripteý sıaqty mańyzdy salalarǵa erekshe toqtalyp, bul baǵytta partıa aýqymdy jumystar júrgizetinin aıtty.

– Elbasy táýelsizdik alǵaly beri aıtysty qoldap kele jatyr. Aıtys bizdiń salt-dástúrimizdiń ajyramas bir bóligi. Ol da praımerız sıaqty. Sebebi ol jerde ashyq syn aıtylyp, eldiń sózin sóılegen eń myqty aqyn jeńiske jetedi. Partıada praımerızder solaı ótýi kerek. Óıtkeni partıa naǵyz demokratıalyq ınstıtýt. Sondyqtan ishki partıalyq demokratıa qalyptasyp, túrli pikirler aıtylýy tıis. Sol sebepti partıa aldaǵy ýaqytta barlyq máseleni ashyq talqylaıtyn bolady, – degen Baýyrjan Baıbek «Nur Otan»-nyń halyqtyq partıa ekenin, sondyqtan halyqtyń sózin sóılep, muńyn muńdap, azamattardyń ne nársege muqtaj ekenin bilý, eldiń arasynda júrip, etene jumys isteý partıalyqtardyń basty mindeti ekenin jetkizdi.

Sondaı-aq ol aıtysker bolý úshin talant pen darynnan bólek jan-jaqty bilim de kerek ekenine toqtaldy.

– Aıtysker bolý úshin talant kerek. Sonymen birge bilim men mádenıet te qajet. Sondyqtan partıa aıtys óneriniń damýy úshin aıtyskerlermen jumysqa da basa mán beredi, – dedi Baýyrjan Baıbek.

Áńgime barysynda ulttyq rýh máselesi de nazardan tys qalǵan joq. Bul jóninde partıa Tóraǵasynyń Birinshi orynbasary ulttyq rýhy osal halyqtyń eshqandaı bıikke kóterile almaıtynyn aıtty.

– Elbasymyz únemi osy máselege basa mán berip, barlyq jaǵdaıdy jasap keledi. Tuńǵysh Prezıdentimiz bul iste kóbine Japonıanyń tájirıbesin mysalǵa keltirip otyrady. Kezinde alashordalyqtar da salt-dástúr men jańa tehnologıany ushtastyryp, eki jaqtyń ozyq tustaryn qatar alyp júrý kerektigin aıtqan edi. Sol sebepti biz ózimizdiń jaqsy, zaman talabyna saı ulttyq qundylyqtarymyzdy saqtap, qorǵap, olardy bolashaqtyń talaptarymen úılestire damytýymyz kerek. Al kemshiń tustarymyzdan bas tartýdan qoryqpaýymyz qajet, – dedi Baýyrjan Baıbek.

Sondaı-aq ol 2013 jyly qabyldanǵan «Nur Otan» partıasynyń doktrınasyna toqtalyp ótti.

– Partıamyzdyń doktrınasynda tól mádenıetimizdi, rýhanıatymyzdy damytý máseleleri ashyq aıtylǵan. Bul – biz úshin asa mańyzdy. Sebebi qazirgi tańda qoǵamdaǵy keıbir máseleler osy saladaǵy olqylyqtardan bolyp otyr. Sonyń ishinde eń aldymen otbasylyq qundylyqtarymyz álsirep ketti. Sondyqtan aldaǵy ýaqytta partıa osy baǵyttaǵy jumystardy qolǵa alady, – degen partıa Tóraǵasynyń Birinshi orynbasary Táýelsizdigimizdi nyǵaıtyp, eldigimizdi bekemdeý úshin barsha qazaqstandyqtar judyryqtaı jumylyp áreket etýi kerektigin aıtty.