Qazaqstan Respýblıkasynyń Konstıtýsıa kúnine oraı Aqtaýda merekelik shara ótti. Ata Zańymyzǵa bıyl 24 jyl tolyp otyr. Osy jyldar ishinde elimiz órkendedi, damydy, elde jańa reformalar jasaldy. Mańǵystaý oblysynyń ákimi Serikbaı Trumov sol jyldary elimizdiń basynan ótken oqıǵalar men atqarylǵan jumystar týraly baıandap, turǵyndardy memlekettik merekemen quttyqtady.
- Konstıtýsıa – saıası turaqtylyq pen qoǵamdyq kelisimniń kepili! Ata Zańymyzdyń buljytpaı oryndalýynyń arqasynda elimizdiń irgesi bekidi, halqymyzdyń tatýlyǵy men turaqtylyǵy nyǵaıdy, beıbitshilik pen kelisimniń úlgisin kórsetip, Qazaqstan júzden asa ult ókilderiniń aıaýly atamekenine aınaldy. «Baǵalaı bilmegenge baq qonbaıdy, Qýana bilmegenge qut qonbaıdy» - dep Zamanymyzdyń zańǵary, abyz Ábish aǵamyz aıtqandaı, barymyzdy baǵalap, Egemen Elimizdiń birligi men yntymaǵy úshin jasap júrgen ıgi isimizge bereke tileımin, - dep aımaq basshysy óziniń jyly lebizin bildirdi.
Sonymen birge, saltanatty jıyn kezinde Qazaqstan Respýblıkasy Konstıtýsıasynyń ulyqtyǵyn qamtamasyz etýge, konstıtýsıalyq negizderiniń qalyptasýy men damýyna, azamattardyń konstıtýsıalyq quqyqtaryn qorǵaýǵa eleýli úles qosqany úshin birneshe azamattar marapattaldy. Atap aıtsaq, Mańystaý oblysy prokýrorynyń orynbasary Erjan Turmaǵanbetovke, Mańǵystaý oblysy prokýrorynyń aǵa kómekshisi Iýlıa Kartashovaǵa, basqarma basshysy Jumabaı Qýanovqa, jedel ýákil Nurjan Talasovqa, Polısıa polkovnıgi Asqar Djaılaýbaevqa, Polısıa maıory Erkebulan Qydyrbaevqa Mańǵystaý oblysy ákiminiń Qurmet gramotasy, sottar ákimshisiniń bas mamany Ásem Aralbaeva men Gúlbaqyt Ibraımovaǵa, Jańaózen qalasynyń aýmaqtyq bólim fılıaly basshysy Saǵıra Esetovaǵa, Mańǵystaý oblysy Ádilet Departamentiniń zańdy tulǵalardy tirkeý jumysyn uıymdastyrý bóliminiń basshysy Aqmaral Mahsutqa, kishi ádilet keńesshisi Altyngúl Turǵanbaıǵa, oblystyq advokattar alqasynyń advokaty Radık Ómirbolatovke Mańǵystaý oblysy ákiminiń Alǵys hattary tabystaldy.