Búgin, 31 tamyzda Almaty oblysy Jambyl aýdany "Kókbastaý" ıpodromynda Qazaqstannyń burynǵy prezıdenti Nursultan Nazarbaevtyń kýbogy úshin QR Konstıtýsıa kúnine arnalǵan ulttyq at sporty túrlerinen halyqaralyq jarys ótti dep jazady Qamshy.kz aqparat agenttigi. 

Almaty oblysy ákimdigiń uıymdastyrýymen ótken jarysta at sportynyń úzdikteri  báıgeniń birneshe túrinen jáne "Qyz qýý", "Aýdaryspaq", "Teńge ilý", "Jamby atý" sıaqty qazaqtyń ulttyq sport túrlerinen synǵa tústi. Atalǵan jarysqa Qazaqstannyń ár aımaǵynan jáne Qyrǵyzstan Respýblıkasynan áıgili atbegiler men belgili shabandozdar qatysty. 

Báıgeniń eń tanymaly sanalatyn "Alaman báıgede" Nursultan Nazarbaevtyń nemere inisi Álnur Nazarbaevtyń "Úshqońyr" atty tulpary birinshi kelip, bas júldege tigilgen sheteldik avtokólikti ıelendi. Sonymen qatar Álnur Nazarbaev "Qarlyǵash" atty tulparymen "Qunan báıgede" de birnishi oryndy aldy. 

Qazaqstannyń alǵashqy prezıdenti Nazarbaevtyń júldesi úshin at sporty túrlerinen halyqaralyq jarys osymen 21 márte ótti.