Almaty oblysy Qarasaı aýdany Raıymbek aýylynda gazbetondy blok shyǵaratyn kásiporynda joıqyn jarylys boldy dep habarlaıdy Qamshy.kz aqparat agenttigi. Bul týraly İİM tótenshe jaǵdaı komıteti habarlady.

Saldarynan bir er adam qaza taýyp, taǵy úsheýi túrli jaraqatpen aýrýhanaǵa jatqyzyldy. Oqıǵa keshe saǵat on ekiler shamasynda bolǵan.

"Almaty oblysy TJD kezekshilik púltine Qarasaı aýdanyna qarasty Raıymbek aýylynda gazbetondy blok sehynda jarylys bolǵany týraly habar tústi. Joǵary qysymnan avtoklav jarylyp, jarylystan seh ishinara buzylǵan", - delingen habarlamada.

Joıqyn jarylystan tútin shyǵaratyn qubyrdyń synyqtary jeke turǵyn úı sektorynyń aýmaǵyna ushqan.

Polıseıler men oblystyq TJD qyzmetkerleri oqıǵa ornynan 58 jastaǵy er adamnyń denesin tapty. Taǵy úsh adam túrli jaraqatpen aýrýhanaǵa tústi.

Budan bólek, sehqa jaqyn mańda turaqta turǵan birneshe avtokólikke zıan keldi.