Almaty men Nur-Sultanda 21 qyrkúıek kúni bolǵan narazylyq jıyndary kezinde polısıa  57 adamdy ustady dep jazady Qamshy.kz aqparat agenttigi. Bul týraly Qazaqstannyń ishki ister mınıstrliginiń baspasóz qyzmeti habarlady. 

Mınıstrliktiń habarlamasynda "jekelegen azamattar prokýratýranyń eskertýine qaramastan tyıym salynǵan ekstremıstik uıymnyń arandatý áreketterine erip ketkeni"  aıtylǵan. 

"21 qyrkúıekte Nur-Sultan men Almatyda ruqsat etilmegen mıtıńiler ótkizýge áreket jasaldy. Prokýratýranyń birneshe ret eskertýlerine qaramastan, jekelegen azamattar tyıym salynǵan ekstremıstik uıymnyń arandatýshylyq shaqyrýlaryna ushyrady. Olardyń keıbireýleri basqa azamattardyń tynyshtyǵy men qaýipsizdigine jáne jol qozǵalysy qaýipsizdigine qaýip tóndirdi. Quqyq qorǵaý qyzmetkerlerine qarsy zańǵa qaıshy áreketter jasaı bastady", - delingen vedomstvo taratqan habarlamada.

Mınıstrlik habarlamasynda  "Nur-Sultan men Almatyda  quqyq buzýshylyq jasaǵany úshin 57 adam ustalǵany, qazir olardy ákimshilik jaýapkershilikke tartý máselesi qarastyrylyp jatqany" jazylǵan.

21 qyrkúıekte Almaty, Nur-Sultan, Shymkent qalalarynda bıliktiń ruqsatynsyz adamdar ortalyq alańdarǵa jınaldy. Jergilikti bılik pen prokýratýra ókilderi azamattardyń bul árketin "ruqsat etilmegen mıtıń" ekenin aıtty. 

Qazaqstan bıligi jınalǵandardy elde tyıym salynǵan "Qazaqstannyń demokratıalyq tańdaýy" (QDT) uıymynyń jetekshisi Muhtar Áblázovtyń arandatýymen arnaıy jınalǵanyn aıtty.

Qamshy.kz aqparat agenttiginiń tilshisi Almatydaǵy "Astana" alańynyń mańyn polısıa men arnaıy jasaq túski saǵat 11.00 shamasynan bastap qorshap turǵanyn jáne túski saǵat 14.20-dan bastap azamattyrdy ustaǵanyn kórgen.