Birǵanym Áıtimova Senatorlar keńesi tóraǵasynyń orynbasary bolyp taǵaıyndaldy dep habarlaıdy Qamshy.kz aqparat agenttigi.

30 qyrkúıekte Nur-Sultanda Senatorlar keńesiniń birinshi otyrysy ótti. Otyrys barysynda Birǵanym Áıtimova tóraǵanyń orynbasary bolyp saılandy. Keńes hatshysy bolyp depýtat Nurlan Qylyshbaev taǵaıyndaldy. Keńesti Senat tóraıymy Darıǵa Nazarbaeva basqarady.

Senatorlar keńesine Parlamenttiń burynǵy jáne qazir jumys istep jatqan 50 depýtat kirdi. Osyǵan deıin, Prezıdent Qasym-Jomart Toqaev birneshe senatorlardyń, onyń ishinde Birǵanym Áıtimovanyń ókilettigin toqtatty.

Birǵanym Áıtimova 1953 jyly 26 aqpanda Batys Qazaqstan oblysynda dúnıege kelgen. Ár jyldary jastar isi, týrızm jáne sport mınıstri, Qazaqstannyń Izraıl men Italıadaǵy elshisi boldy.

Sondaı-aq premer-mınıstrdiń orynbasary jáne BǴM basshysy bolyp jumys istedi. BUU janyndaǵy Qazaqstannyń Turaqty ókili boldy. 2013 jyldyń 26 tamyzynda Senat depýtaty bolyp taǵaıyndaldy.

Senatorlar Keńesi konsýltatıvtik-keńesshi organ bolyp tabylady jáne qoldanystaǵy jáne burynǵy depýtattardyń usynystaryn ázirleý, tájirıbe almasý, parlamentarızmdi damytýǵa baǵyttalǵan sharalardy ótkizý úshin qurylǵan.  Aıta keteıik, mamyda Tuńǵysh Prezıdent Nursultan Nazarbaevqa Qurmetti senator mártebesi berilgen edi.