Qazaqstan prezıdenti Qasym-Jomart Toqaev 8 qazanda Nur-Sultanda óziniń basqarýymen ótken elordany odan ári damytý jónindegi jınynda Qazaqstan sıfrly tehnologıalardy damytýda Qytaıdyń tájirıbesin qoldanýy keregin aıtty. 

Toqaevtyń aıtýynsha, "Qytaıdyń sıfrlandyrý tehnologıalary kez kelgen adamnyń jeke bas derekteri týraly aqparat beredi".

– Hikvision kompanıasy (red. Qytaıdyń)… Olardyń tehnıkasy jaqsy damyǵan. Negizgi qalalaryn sıfrlandyrdy. Óte jaqsy sıfrlandyrdy.  Ekrandy bassań, adam jaıly barlyq aqparat shyǵa keledi. Qaı jyly ınstıtýt támamdady, bos ýaqytynda qaıda barady, qandaı kredıti bar bári shyǵady, – dedi Qazaqstan prezıdenti. 

Sonymen qatar Toqaev "Biz osy jolmen júrýimiz kerek. Bul – álemdik tendensıa. Astana basshylyǵyna, úkimetke jáne tıisti mınıstrlikke osyny tapsyramyn" degen sózder de aıtqan. 

Budan bólek, Toqaev osy jınyda ótken jyldan beri Qazaqstannyń birneshe qalasynda qoldanylyp kele jatqan "Sergek" beınekameralarynyń qoǵamdyq qaýipsizdik deńgeıin arttyrý úshin emes, kólik júrgizýshilerden aıyppul óndirip alý úshin ǵana qoldanylyp otyrǵanyn synaǵan.

Azattyq Radıosynyń jazýynsha, Toqaev aıtqan Hikvision kompanıasyna AQSH-tyń saýda mınıstrligi sanksıa salǵan. AQSH Hikvision bastaǵan Qytaıdyń 28 kompanıasyn "Shyńjańdaǵy az ulttarǵa qysym jasaýǵa atsalysty" dep sanaıdy. Toqaev qyrkúıekte Qytaıǵa barǵan saparynda Hikvision kompanıasynyń shtab-páterin aralaǵan.

Qazaqstanda 2017 jyldan beri Qytaıdaǵa etnıkalyq qazaqtardyń máselesi kóterilip júr. Qytaıdan Qazaqstanǵa oralyp el azamattyǵyn alǵan kóptegen etnıkalyq qazaqtar sońǵy jyldary Qytaıdaǵy týǵan-týystarynyń Shyńjańdaǵy "saıası tárbıe lagerlerinde" qysym kórip otyrǵanyn aıtyp, Qazaqstan bıligi men halyqaralyq uıymdardan kómek surap keledi. Bıylǵy jyldyń qyrkúıek aıynda Qazaqstannyń birneshe qalalarynda "Qytaı ekspansıasyna qarsy" narazylyq aksıalary ótip, oǵan qatysqan ondaǵan adam ákimshilik jaýapqa tartylyp, keıbiri qamalyp, keıbirine aıyppul salyndy. El halqynyń qarsylyǵyna qaramastan Qazaqstan prezıdenti 21-25 qyrkúıek kúnderi Qytaıǵa is-saparmen baryp, artynsha Qytaı parlamentiniń jetekshisi Lı Chjanshý Qazaqstanǵa keldi.