Ábish Kekilbaevtyń shyǵarmalaryn nasıhattaýǵa baǵyttalǵan alǵashqy teatr festıvali 2016-jyly respýblıkalyq deńgeıde ótse, bıyl 80 jyldyq mereıtoıy aıasynda «ABISH ALEMI» festıvali halyqaralyq deńgeıde shymyldyǵyn túrdi. Mańǵystaý oblysy ákimdiginiń uıymdastyrýymen, respýblıkamyzdyń Mádenıet jáne sport mınıstrligi jáne TÚPKSOI-dyń qoldaýymen bastalǵan festıvál ózge eldermen mádenı-rýhanı baılanysty nyǵaıtýdaǵy altyn kópir ispettes. Álemniń jeti elinen kelgen kásibı jáne mýzykalyq drama teatr ártisteri Aqtaýdaǵy Nurmuhan Jantórın teatry sahnasynda ózara synǵa túspek.
«Rýhanı jańǵyrý» baǵdarlamasy aıasynda uıymdastyrylǵan «ABISH ALEMI» birinshi halyqaralyq teatr festıvaline qatysýǵa nıet bildirgen teatr ujymdarynyń qoıylymyn, qazylar alqasynyń bedeldi músheleri Abyz tulǵa Asanáli Áshimov, «Altyn qalam» syılyǵynyń laýreaty Israfıl Israfılov, Batys Qazaqstan oblystyq qazaq drama teatrynyń qoıýshy rejıseri - Serdesh Qajymuratov, Ǵ.Músirepov atyndaǵy Qazaq memlekettik akademıalyq balalar men jasóspirimder teatrynyń kórkemdik jetekshisi – Erkin Jýasbek, Qazaqstannyń eńbek sińirgen qaıratkeri – Nurken Óteýil, Qazqstan Respýblıkasy memlekettik syılyǵynyń laýreaty – Ádil Ahmetov, Mańǵystaý oblysynyń «Jyl adamy – 2016» nomınasıasynyń ıegeri Medǵat Ómirálıev saraptaıtyn bolady.
«ABISH ALEMI» Birinshi halyqaralyq teatr festıvaline birneshe teatr ujymy qatyspaq. Olar:
1) Armenıadan Abelán Vanadzor memlekettik drama teatry;
2) Grýzıadan Tbılısıdiń Memlekettik Azerbaıdjan teatry;
3) Irannan Bıle Savar Barbod teatry;
4) Ózbekstannan Horezm teatry;
5) Tájikstan K.Hýdjandı atyndaǵy mýzykalyq komedıa teatry;
6) Túrkıanyń Memlekettik teatry;
7) Túrkmenistan memlekettik teatry;
Condaı – aq6 Qazaqstannan M.Áýezov atyndaǵy memlekettik akademıalyq drama teatry, J.Aımaýytov atyndaǵy Pavlodar oblystyq drama teatry jáne N.Jantórın atyndaǵy drama teatry qatysyp, óner kórsetedi.
Halyqaralyq teatrlar festıvalinde Mańǵystaý drama teatry Ábish Kekilbaevtyń «Bir shókim bult» shyǵarmasymen «Kúı» povesin sahnalaıdy. Kúı povesinde róldi somdaýshylardyń basym bóligi er adamdar, al mono spektákldi bir áıel somdamaq.