«Búgin meniń qabyldaýymda qala turǵyny bir áıel kelip kúıeýiniń kúnde araq ishetinin aıtyp, jasyryn túrde satylatyn arzan araqqa tosqaýyl qoıýdy surady. Al, keshke ózim qala aralap júrip mynandaı masqaraǵa tap boldym (vıdeo- red). Ata - babam ishpegen araq - sharapty qalaı toqtatamyz aǵaıyn, aqyl aıtyńyzdarshy, jolyn kórsetińizdershi. Polısıa bastyǵy U. Sadyqov jáne kirister basqarma basshysy Q. Nurǵalıev shuǵyl shara qoldanyńyzdar». Bul pikir Tekeli qalasynyń ákimi Bahtıar Ónerbaevtyń feısfýk paraqshasynan alyndy.

Oqıǵany naqty baıandar bolsaq, qala ákimi Bahtıar Ónerbaev keshkilik  Otan soǵysy ardagerleri eskertkishiniń mańynda "tentek sý" iship otyrǵan úsh jigitti kóredi. Olar ákimdi kórip tura  qashady. Vıdeodan «Neǵyp otyrsyńdar, mynaý senderdiń iship otyrǵandaryń araq qoı. Nege araq ishesińder, bul jerde. Túrińdi kórset! Beri kel, beri! Ana bótelkeni al!» degen qala ákiminiń daýsy estiledi. Al úsh jigit iship otyrǵan araǵyn stakandarymen qosa laqtyryp qasha jóneledi.  

Al oqıǵa nemen aıaqtaldy? Bul jerde polısıa ókilderi iske qumbyl  kirisken. Munan keıingi jaǵdaıdy biz qala ákimi Bahtıar Ónerbaevtyń óz aýzynan estidik.

­–Erteńine Otan soǵysy ardagerleriniń gúlzarynda araq iship otyrǵan úsh jas ákimshilikke kelip, keshirim surady. Ant sý iship, endi araqty aýzyna tatyp almaıtyndaryn aıtty. Aıyp retinde olar ardagerlerge arnalǵan eskerkishterdi jýyp, onyń mańyn tolyqtaı tazartýǵa ýáde berdi,- deıdi qala ákimi Bahtıar Ónerbaev.

Bizdiń bilgenimizdeı, is sotqa joldanǵan. Al ardagerler gúlzary men saıabaq jáne qalanyń kórikti jerleri  araq ishetin oryn emes. Muny jas jigitter de túsingen bolýy kerek. Sóıtip qala ákimi  «tentek sý» ishken tentekterdi tyıdy, olardy qoǵamdyq iske tartty. Bizdiń aıtpaǵymyz, buǵan ákim ǵana emes, qoǵam da qozǵaýshy kúsh bolýy qajet.