Qazaqtyń birtýar aqyny Qadyr Myrza-Álıge Batys Qazaqstan oblysynda eki eskertkish ashyldy. Sol kúni oblys ákimi Nurlan Noǵaev biraz jýrnalisterge alǵys hat taratty.
«Aqyndyq shyǵar aıypty,
Áli bilmen sebebin.
Óleńge aıtyp qoıyppyn,
Ómirdiń aıtpa degenin...»
Tolaǵaılarmen teńdestiń,
Bilmestikpenen beldestiń.
Ózgerer emes dúnıe,
Kúıińdi, aǵa, men keshtim...
Kúıińdi keship, túsindim,
Júregim jara, ishim muń.
Jaralanyp aqıqat,
Ádiletsizdik tushyndym...
«Qaı jerde de bir ólim,
Qaımyqpadym dáýden de.
Búkil jurttyń júregi,
Myna meniń keýdemde»
Dúnıe shashsyz, taz – basy,
Peıilim, biraq, azbashy!
Júregimnen sorǵalar,
Qazaǵymnyń kóz jasy...
Namysym nardaı julqyndy,
Sabyrmen kútken myń kúndi.
Tilimdi kesip alsa da,
Satpaımyn týǵan ultymdy!
«Dushpanǵa meni balama,
Muqatý izdep sezimnen.
Adam bop týý – anadan,
Aıýan bop ketý – ózińnen»
Sheksizdik – saǵymsýdaı-dy,
Teksizdik – zapyran ýdaı-dy.
Jatqany bekzat bel bolsa,
Anadan – nadan týmaıdy!
Sózime senbe – sen meıli,
Bıikke – bıik teń deıdi
Maımenen basyn jýsań da,
Ákege muńsyz ermeıdi...
«Jolyn qýyp jamannyń,
Juqtyrmaıtyn arǵa shań.
Armany úlken Adamnyń,
Ózi de úlken árqashan!»
Bu kúnde ardy tusap baq,
Bolmysy – baqyt, túsi – áppaq.
Ózine uqsap adamnyń,
Armany ketken usaqtap!
Shaq kelmese de tánime,
Basyp men eski ánime...
Jalynan ustap jarmastym,
Armannyń dáýi, nánine!
«O, dalam, meniń baıtaǵym,
Dalam dep óleń aıtamyn.
Solǵan Aı bolyp baram da,
Tolǵan Aı bolyp qaıtamyn»
Baıtaǵyń, aǵa, «súrindi»,
Bola almaı bekzat bir úlgi.
Aýasy ańqyp, qan sasyp,
Kıigi qulap, qyryldy.
Sebebin Haqtan suraǵyn,
Jaratqan biler, shyn, aǵyn...
Obalyn oılap jandynyń,
Dalammen birge jyladym!..
************************
...Eskertkishpenen sátin sap,
Merekeniń birge kelgeni...
Áıtse de, teksiz sheneýnik,
Quttyqtaýyn da bermedi...
Shyndyqty aıtsaq shyryldap,
Bolady-aý bizge taǵy aıyp...
Jalǵany tolǵan alǵys hat,
Bermeı-aq qoısyn, Noǵaev!..
«Ótirik jyrdyń qaıdaǵy,
Bolmaısyń jetip shetine.
Aqıqat – sózdiń qaımaǵy,
Turmaıdy shyqpaı betine»...
Júnjimes, biraq, «júdeýli» er,
Adalǵa Alla – tireý ber!
Jalǵannyń – jalǵan ekenin,
Túsinbeı óter bireýler...
...Baǵytyn ańdap bas-úıdiń,
Qaınaǵan qandaı tasımyn!
Bıshigesh – maǵan bı emes,
Elime ǵana bas ıdim!
Qajymuqan ǴABDOLLA
maýsym-shilde, 2015 jyl,
