Qazaqstanda memlekettik qyzmetkerlerge tuzaq qurý naýqany bastalyp ketken be? Sońǵy kezderi bıik laýazymdy sheneýnikterdiń leg-legimen qylmysqa shatylyp, aldyndaǵylary shekara asyp, qashyp jatsa, artyndaǵylar temir torǵa toǵytylyp jatqanyna jurt tań qalmaıtyn jaǵdaıǵa jetken edik. Endi kishi saıası fıgýralardyń da basyna bult úıirile bastapty. Endi ákimder kisi qolynan qaza bolyp jatyr. Bul týraly «Qamshy» portaly habarlaıdy.
Aqmola oblysyna qarasty Belaǵash aýylynyń ákimi Iana Aleksandrovna Kryl kisi qolynan qaza boldy. Tup-týra jumys kabınetinde. Keı málimetter boıynsha marqumdy óziniń jary ákimshilik ǵımaratynda azaptap, birneshe jerden pyshaqtap tastaǵan kórinedi. Kúdikti munan soń ózin-ózi jaralap, moınyn pyshaqtap tastaǵan. Bul týraly oblystyq İİD habarlaıdy. Ákimshilikte jaralanǵan ákim men onyń joldasy dereý Jaqsy aýdanyndaǵy aýrýhanaǵa jatqyzyldy. Búgin tańerteń ákim esin jıa almaı, kóz jumdy. Al onyń joldasy jansaqtaý bóliminde jatyr. Aýrýhanada qarýly kúzet toby jumys jasaýda. Qaıǵyly oqıǵa keshe keshqurym oryn alǵan. Keshki saǵat 20:05-te Jaqsy AİİB kezekshi bólimine Belaǵash aýylyndaǵy 1978 jylǵy 33 jastaǵy azamattan aýyldyq okrýg ákimine pyshaq suqqany týraly telefon habarlamasy kelip túsken. Sodan keıin kúdikti ózine-ózi qol jumsamaq bolyp, moıyn tusyna pyshaq suqqan, - dep jazady bnews.kz oblystyq İİD baspasóz qyzmetiniń qyzmetkeri Aqbota Muqashevanyń málimdemesine silteme jasaı otyryp.
Al osydan úsh kún buryn, 15-shilde kúni taǵy bir ákim belgisiz jaǵdaıda qaıtys bolǵan. Bul Shyǵys Qazaqstan oblysy Kúrshim aýdanynyń ákimi Altaıbek Seıitov. Ákimniń óli denesi óz úıinde tabyldy. Osy oqıǵaǵa oraı qylmystyq óndiris bastaldy. Bul týraly oblystyq İshki ister departamentiniń baspasóz qyzmeti habarlaǵan (egemen.kz).
14 shildede Kúrshim aýdandyq İshki ister basqarmasyna aýdan ákimi Seıitovtiń denesi óz úıinde tabylǵany jóninde habarlama kelip túsken. Osy oqıǵaǵa baılanysty qylmysty anyqtaý jumystary bastalyp, qazirgi kezde oqıǵa ornynda Shyǵys Qazaqstan oblysy ishki ister departamentiniń jedel-tergeý toby jumys isteýde» delingen. Aıta keteıik, 64 jastaǵy A.Seıitov aýdan ákimi qyzmetin 2007 jyldan beri atqaryp keldi.
Esterińizde bolsa 2014 jyldyń qazan aıynda taǵy bir ákim belgisiz jaǵdaıda qaza tapqan edi. Tergeý jumystarynyń qorytyndysy boıynsha ákim júrek talmasynan kóz jumdy delingen bolatyn. Bul joly Kókshetaý qalasynyń ákimi Jomart Nurǵalıev kenetten qaıtys bolǵan. Eske sala ketsek, Jomart Nurǵalıev 2014 jyldyń 5 maýsym kúni Aqmola oblysynyń ákimi Sergeı Kýlagınniń ókimimen Kókshetaý qalasynyń ákimi bolyp taǵaıyndalǵan edi. Ókinishke qaraı, marqum bes aı ǵana qyzmet istedi.
Al sol jyldyń qarasha aıynda qos birdeı aýyl ákimi jol apatynan qaza tapqan. Oblystyq İİD baspasóz qyzmetiniń habarlaýynsha, qaıǵyly oqıǵa respýblıkalyq «Jezqazǵan-Petropavl» tasjolynyń 860-shaqyrymynda bolǵan. Kóktaıǵaq kesirinen «VAZ 2107» men «VAZ 2106» kólikteri soqtyǵysyp, 3 adam kóz jumdy. Taǵy úsheýi aýrýhanaǵa jetkizildi. Qaıtys bolǵan Qyzyljar aýdanyna qarasty Kýıbyshev aýyldyq okrýgynyń ákimi Aleksandr An 2013 jyly ákim qyzmetine taǵaıyndalǵan bolatyn. Oqıǵa ornynda kóz jumǵan ekinshi ákim Mahmet Baıbosynov ta Qyzyljar aýdanyna qarasty Arhangelka aýyldyq okrýgyn sońǵy eki jyldan beri basqaryp kelgen.
Iá, Qazaqstanda ákim aýlaý maýsymy bastalyp ketken kórinedi. Biri jol kólik oqıǵasynan, endi biri belgisiz jaǵdaıda, al taǵy biri tapa-tal túste jumys ornynda kisi qolynan qaza tapqan. Sonda bular da qazirgi saıası júıeniń qurbandary ma?
Nurgeldi Ábdiǵanıuly
