Tirshilik túnegin serper ún
Aqyret áýenin taratty.
Kúrsine kóz ashyp kórkem muń,
Mekkeniń múbárak tańy atty...
Máńgilik sazyna múlgıdi
Jalǵannyń jánnatyn jıǵan jer.
...Sezimsiz súldeler syrǵıdy,
Jaratqan, bul elge ıman ber!
4.11.2011.
* * *
Ýa, Paıǵambar!
Jappar ıem qoıǵanymen keshirip,
Men ózime nazalymyn, osyny uq!
Kóńiline Qaǵba ornatqan úmbetiń
Kete almady qabirińdi kóshirip...
Seniń nurly iziń qalǵan óńirdi
Qıyp keter keshem qalaı kóńildi?
Qıamette kóriskenshe kúńirenip,
Súrem qalaı senen qalǵan ómirdi?!
Shermendemin sharasyzdan qaırańdar,
Kelte nyǵmet násip bolsa, ne aılam bar?!
Ertegisi erte úzilgen sher kóńil
Úmbetińdi umytpashy, Paıǵambar!!!
11.11.2011.
* * *
Perzentimin men de ózińdeı muńly eldiń,
Qazaqy muń – qanymdaǵy bir belgim.
Sar dalada saǵynyshpen selbesip,
Men ómirdi seni ańsaýmen súrgenmin...
Qaıǵylyǵa jalǵan bolsyn qaıdan jar,
Jan shydamas jazaly etken jaıdy ańǵar:
Kórgenimshe bir muń ediń kóńilimde,
Kórgennen soń myń muń boldyń, Paıǵambar!
Bolmysyńa baq buıyrǵan bıikten,
Jandy túgil, Jaratqanǵa súıikti eń.
Aqyretti arman etem men endi
Qutqarar dep saǵynyshtaı kúıikten...
13.11.2011.
* * *
Nur qushqan jurttyń nyǵmeti Haqtan en tegin,
Osynsha baqty kótergen qalaı jer tegi:
Janarda jasy, sájdege basy ıilip,
Kún súıgen kókten Paıǵambar eli – ertegi...
Álimsaq kúnnen aqyrǵa jeter arman-án
Kúıreıdi keıde kúdikten kóńil qarmaǵan.
...Kúrsinip jıi qol jaıam kókke beıýaqta,
Azandy eldiń aqyryn tilep Alladan...
11.11.2011.
* * *
Bul netken jer, netken jer?
Qýarǵan tinge qut daryp,
Táńirim nuryn tókken jer.
Tozaqtan tiri qutqaryp,
Paıǵambar kelip jetken jer.
Muńsyzdyń kógi bulttanyp,
Muńlyqtyń jasy kepken jer,
Dindi de dinsiz suqtanyp,
Arman ǵyp máńgi ótken jer.
Bul netken el, netken el?
Qudaıdyń ózi qıǵanyn
Qıyspaı quldar ketken el.
Jalǵannan asyp jıǵany,
Barlyqtyń zaryn shekken el.
Tárk etip taǵdyr syı-dámin,
Baqytty basqa tepken el,
Shaıqalyp baryp ımany
Tarıhyn talqan etken el...
11.11.2011.
* * *
Kúrsindi kóztanys kóresim,
Túgesip shaqtaýly shattyǵyn.
Jutatyp jumaqtyń elesin,
Beıýaqta bulttanyp batty kún...
Jaýtańdap jaz-ǵumyr qaldy úmit,
Qursana qarsy aldy taǵy qys.
Jaratqan jar etken máńgilik
Janymnyń jazasy – saǵynysh...
11.11.2011.
* * *
...Bozmunar kóshken dalada
Bulyń da bulyń bel jatyr.
Saǵynysh esken sanada
Saqtarsyń neni, sen ǵapyl?!
Jalǵandy oılap júdeseń,
Jazmyshtan jalǵyz janǵa úkim:
Jerýanı baqyt tileseń –
Jer beti bolar jánnatyń.
«Tilegim – dıdar tek» deseń,
Jaqsylyq kútpe jerde kóp.
Sertine rýhtyń jetpeseń,
Súısiner ǵumyr sende joq!
Pánı men baqı arasyn
Peıilmen pende jalǵaǵan.
Nápsi me, rýh pa alasyń –
Ekiniń birin tańda, adam!
Peıishten qalǵan adasyp
Perishte dáýren kóshken kún,
Kúnáhar adam balasy,
Kúnásiz jerge qosh keldiń!!!
13.11.2011.
* * *
Tamuqta tiri tunshyǵyp,
Jer basyp júrý – qulshylyq.
Túsińe taǵdyr enedi
Ushpaqqa rýhyń umsynyp.
Sebezgi sáýle tógedi
Kóńilińnen sonda kún shyǵyp.
Jarq etip, qaıta sónedi
Jalǵannan jany túrshigip.
Baqyttyń tappaı deregin,
Kóshedi kúnder kúrsinip.
...Kúıikpen tolǵan kemeri
Tozaǵym meniń – tirshilik...
15.11.2011.
* * *
Kór baqytqa bárimiz de birdeımiz,
Jazmysh qana jandy urlar.
Qaıtse durys bolatynyn bilmeımiz,
Sondyqtan da taǵdyr bar...
Kóńil shirkin kemeldikke kezergen,
Kúı keshse de ne túrli.
Al adamdyq tańdalmaıdy ázelden,
O da taǵdyr sekildi...
30.11.2011.
* * *
Taǵdyrym taýqymetteı ǵalam kútken,
Arylmaı azalaıdy sanam júkten.
Tozǵansha temir taǵat turalatqan
Azaptyń armany joq maǵan bitken.
Qalsa da kelte ǵumyr qas-qaǵymdaı,
Pendelik paryz kóshpes bastan udaı:
Ótermin muń arqalap, qaıǵy teńdep,
Bir tamshy aqyretke jas qaldyrmaı...
30.11.2011.
* * *
Tamyrynan tanatyn tus kelgende,
Tor nápsige tutqyn bop túsken jerge,
Jaza basyp, jańylǵysh jaratylǵan
Perishteden mereıi ústem pende...
Taǵdyr syny taǵy da saǵatsyz kep,
Talaýratqan tul jalǵan taǵatty úzbek.
...Shyrqaı almaı rýh qusy shyrqyraıdy,
Álimsaqta qyrqylǵan qanatty izdep...
30.11.2011.
* * *
Haýa ananyń zary
Jazmyshqa tańar jumaqy jandy
Saıabyr edi surapyl aldy.
Jaratýshynyń jasampaz isi
Jaratylysqa, sirá, tuman-dy...
Sıqyr bop tartar sanaly jandy,
Syrqumarlyqtyń alaýy jandy.
...Tánimniń emes, jemiste sol bir
Janymnyń, bálkim, qalaýy bar-dy.
Belgisizdiktiń derti kúshti edi,
Taǵdyr bop tapty tolqyn ishtegi.
Jánnatty jaılap, sezinbeı, súımeı,
Perishte bolý qorqynyshty edi...
Adasqan sátten aıbyndy sertim,
Qyzyǵym emes, qaıǵym-dúr erkim.
Arman men ajal arylmas muń bop,
Jumaqtan jylap aıryldym sol kún...
Bolmystan berik bar ma tiregim?!
Adamı ǵumyr – arda tilegim.
...Jandaýa joqpen jol tarttym jyraq,
Jumyr jer bolǵaı jánnatym meniń...
01.12.2011.
* * *
Tirshilikten túıir baq tappaǵan muń
Jalǵan-otqa janymdy qaqtaǵan myń.
Qorlyǵyna qıa almaı qul-ǵumyrdyń,
Ǵazız jandy ǵaryshqa saqtaǵanmyn.
Jaralysta jazǵan dert – jer-tirliktiń
Bosaǵasyn boljaýsyz attaǵanmyn.
Adam ulyn armanmen azaptaǵan
Ar aldynda ajalmen aqtalarmyn.
Aqyretten bir habar jetken kúni
Jalqy sátke shyn kúlip, shattanarmyn.
Kúnáharlyq qursaýyn kúl-talqan ǵyp,
Aı men kúnniń eline attanarmyn...
* * *
Qul-ǵumyrdy qımaǵanmen kúmánge,
Bolmysyńa baq qonbasa, kináń ne?
...Álimsaqta arashaǵa batpaǵan
Jazmysh endi jubata almaı myń áýre...
Bozdaı kóship beıbaq dáýren bastaǵy,
Taǵdyr keshtim tozatyndaı tas-daǵy.
...Mańdaı tustan myzǵymaıdy áıteýir
Jalqy juldyz...
Astananyń aspany...
* * *
Nár tatyrsań nyǵmetten neń keter-di,
Qur besikti, qor jalǵan, terbet endi –
Álimsaqta anttasqan asyl rýhtar
Biri qalmaı tastapty jer-mekendi...
Ujdansyzdan umytqan Ulyǵyn shyn
Tamyry joq teksizdiń tuǵyrysyń.
İbiliske ildirip ar tizginin
Sal-sal bolǵan sanańnyń sury qursyn...
* * *
Nyǵmettiń nuryna malynyp,
Jeti kók jaýharyn jıa kep,
Adamzat terisin jamylyp
Kún keshý ne degen qıamet!!!
Tul qalý taǵdyryn tuǵyrdan
Jat jerlik joqtaýsyz jan uqsyn.
...Tozaqtyń otyna jylynǵan
Sor jalǵan, sen de bir ǵaripsiń...
* * *
Shýaq qımaı sezimge, shabytqa – jyr,
Tańaryń haq túbinde tabytqa bir.
Men ólsem de senen sál bıik turam,
Jasyp kórgen jerim joq, janyqpa qur!
Áz jalǵannyń ázelden esi del-sal:
Kóleńkesiz kúnderim keshiger sál.
...Jıi enesiń túsime nesine, ajal,
Meniń áli kól-kósir nesibem bar...
* * *
Jalǵan joly jýystyrmaı jumaqqa,
Myńdar kóshken muń ornaǵan munartta.
Kúrsinisiń kókti jaryp, áz álem,
Júregińe júk artpa!!!
Hadıs bar-dy: «Bir kúnnen bir kún beter»,
Jazmysh – jalǵyz, buıyrmap ed kimge kór?!
Súleımenniń júziginde jazǵandaı:
«Bári ótedi... Bul da óter!!!»
* * *
Jadylap esti jyr-eles,
Kúdikpen kóship kún-eges,
Baǵdarsyz ketip barasyń,
Baqyttyń joly bul emes!
Jalǵannan kútpe jandaýa!!!
Pánıdiń paqyr qonaǵy –
Jerbaýyr sezim solady.
Adamǵa adam máńgilik
Ańsar bop kórgen joq áli!
Ózińdi-óziń aldama!!!
Enshiniń bitken eregi
Kemeldik bolsa keregiń,
Myń soqpaq kezip, mańyp kór –
Dúnıeniń shyqpas deregi,
Bastaıdy bári Allaǵa!!!
* * *
Bosaǵańa baılanyp bar ǵumyrym,
Jadylap ed beıdaýa jandy nuryń.
Qaıtar joldyń qorlyǵyn qalaı qıdyń,
Meni ózińnen bólgende, Máńgiligim?!
Qul-taǵdyrǵa qalaýsyz qosqanda muń
Jazmyshyńnan jany úrkip, qashqan baǵym.
Jarsyzdyq pen jolsyzdyq maǵan aıan
Senen ketken kúnimnen bastalǵany...
Qudiretten daryǵan qutym baryn
Tanyp turyp, jalǵanǵa jutylǵamyn.
...Men – muńlyqpyn baıansyz bolmysymnan,
Úzirim sol, eı, muńsyz Úkimdarym!
* * *
Saýdaıy taǵdyr synaqta
Sansyrap kesher jerlikpin.
Jamalyń sińgen munartqa
Tal besigimde telmirttiń,
Saryltqan sıqyr saǵym-jar...
Erender eltip izińde
Taba almaı syrdy sorlaǵan.
Pánıdiń paqyr júzinde
Perishte-pende bolmaǵan –
Párýana surly halim dal...
Kúrmeýin muńnyń sheshe almaı
Qor bolyp ótken qulyńmyn.
Jerýanı tirlik keshe almaı,
Jer bolyp ketken ǵumyrmyn...
Jazańa laıyq janym bar...
* * *
Men qataldyq kútpep edim tek Senen...
Óziń súıip jaratyp eń,
Jardan kóńiliń qaldy ma?!
Talyp turyp, tileýimdi kespep em –
Toz-toz bolǵan taǵatymmen
Jyǵylǵanmyn aldyńa...
Muz-kóńilmen syna qaǵyp senimge,
Ańsaryma jer qushtyryp,
Armanymdy aldattyń.
Saǵan senip kelgen edim ómirge,
Jar-sezimdi jelge ushyryp,
Endi qaıda barmaqpyn?!
* * *
Týra kelgen taǵdyryma táýekel:
Sen turǵanda jandy qalaı jar etem?!
Súrinsem de, túńilsem de (o, toba!) –
Seniń meni súıetiniń haq eken!!!
Qulshylyqtyń kim baǵalar qunyn dál,
Uǵar bolsań, uǵynyp kór syrymdy al:
Álem halqy qyzyǵatyn baǵym bar!!!
Álem halqy toryǵatyn muńym bar...
* * *
Baq penen sory kindiktes
Buıyrǵan jolym bulǵaq bop,
Taǵdyrdy taptym tańdamaı.
Aıtylǵan saıyn syr bitpes,
Ashylǵan saıyn jumbaq kóp,
Arylmaı óttim, arman-aı...
Ǵazalyn uqpaı ǵalamnyń
Taǵatsyz kútken Tańsárim,
Kúrmelgen Saǵan kúlkim – muń.
Soryma bitken sanamnyń
Asqynyp tynǵan ańsary,
Ajaly Senen rýhymnyń...
Aınur Ábdirásilqyzy
