Bankten 87 mln teńge urlap, shekara asyp ketken jigittiń haty tabyldy dep jazady Qamshy.kz aqparat agenttigi kstnews.kz saıtynyń deregin negizge alyp. Bul týraly Qostanaı oblystyq polısıa departamentiniń basshysy Beket Aımaǵambetov habarlady. 

Myrzabaı Shalbaev aqsha aıyrbastaý úshin bankke úlken kólemdegi soma alyp kelgen. Beınejazbadan kúdiktiniń kasaǵa ótip, kasır basqa jaqqa qaraǵan ýaqytta aqshany sómkesine salyp alyp ketkenin baıqaýǵa bolady.  Kelesi kúni ol Reseı shekarasynan ótip ketedi. 

"Biz onyń jas jigit ekenin eskerdik. Ol bizdiń qalaı qarýlanǵanymyzdy, qandaı tehnologıany qoldanatynymyzdy bilmeıdi. Onyń qaıtken kúnde de ınternet qoldanady dep boljam jasadyq. Kúdikti Chelábınskke jetkende páter jaldaǵan. Biz arnaıy top quryp, Chelábınskke bardyq, qasymyzda bank qaýipsizdigi qyzmetiniń ókili boldy. Chelábınsk aýdandyq İshki ister basqarmasyna ózim habarlastym, qyzmetkerlerin bizge jiberýin suradym. Taksı júrgizýshisi kúdiktini qaldyryp ketken jerden jumysymyzdy bastadyq. İzderimen júrip, taptyq. Ol óz isin biledi, eshbir qatesiz áreket etti, telefondaryn laqtyryp jiberdi, páterden shyqpaı otyrdy. Ony kompúterlik tehnologıalardyń kómegimen taptyq", - dedi Beket Aıtmaǵambetov. 

Keıin kúdikti barlyq telefondaryn laqtyryp jibergen. 

"Jaýap alý barysynda ol jańa ómir bastaǵysy kelgenin aıtty. Tipti ózine plasıkalyq ota jasaǵysy kelgenin aıtty. Biraq biz ony ýaqytynda qolǵa túsirdik", - deıdi Beket Aıtmaǵambetov. 

Kúdikti Jitiqarada jaldaǵan páterine anasyna hat qaldyryp ketken. 

"Men qaryzǵa battym. Ómirimde mundaı jaǵdaıǵa tap bolamyn dep eshqashan oılamadym", - dep jazǵan hatynda. 

Eske sala ketsek, Jitiqara qalasyndaǵy ekinshi deńgeıdegi bank qyzmetkeri 87 mln teńge urlap, Qazaqstannan qashyp ketti degen kúdikke ilingen. Keıinirek er azamat Reseıdiń Chelábınsk qalasynda qolǵa tústi.