Sońǵy birneshe jyldan beri eger qaramaǵyndaǵy qyzmetkerler para alyp nemese jemqorlyqpen ustalsa, basshysy mindetti túrde qyzmetten ketý kerektigi jóninde pikirler aıtylyp júr. Biraq ol másele qujat túrinde zańdastyryldy ma? Bul máselegi qatysty áńgimeni Ortalyq komýnıkasıalar qyzmetinde ótken brıfıńte Sybaılas jemqorlyqqa qarsy is-qımyl agenttigi tóraǵasynyń birinshi orynbasary Oljas Bektenov málim etti.

Bektenovtyń málimetinshe, birinshi basshy onyń tikeleı baǵynyshty tulǵasyna qatysty sottyń aıyptaý úkimi kúshine engennen soń kúntizbelik 10 kún ishinde nemese aqtalmaıtyn negizder boıynsha qylmystyq is toqtatylǵannan keıin otstavkaǵa ketýge mindetti.

Sonymen, basshynyń qaramaǵyndaǵy baǵynyshtylar kimder bolyp sanalady?

— ortalyq memlekettik organnyń basshysy (mınıstr) úshin – bul onyń orynbasarlary, jaýapty hatshy nemese apparat basshysy, aımaqtyq bólimshelerdiń basshylary;

— oblys, respýblıkalyq mańyzy bar qalalar, astana ákimi úshin – onyń orynbasarlary, apparat basshysy, aýdannyń (oblystyq mańyzy bar qalanyń) ákimi;

— ortalyq memlekettik organ basshysynyń orynbasary (vıse-mınıstr) onyń qaramaǵyndaǵy bólimshe nemese táýelsiz qurylymdyq bólimshe basshysy sybaılas jemqorlyq qylmys jasaǵan kezde qyzmetinen ketedi;

— oblys ákiminiń orynbasary jergilikti búdjetten qarjylandyrylatyn atqarýshy organdardyń basshylaryna jaýap beredi;

— Aýdan ákimi óziniń orynbasarlaryna, apparat basshysyna, jetekshilik etetin aýdandyq atqarýshy organdardyń basshylaryna, aýyl, kent, aýyldyq okrýgterdiń ákimderine jaýap beredi.

Qysqasy, qurmetti basshylar, sizdiń baǵynyshty qyzmetkerlerińiz ne istep júr? Oılanyńyz, «saqtanǵandy ǵana Qudaı saqtaıdy»!

Negizi adal jolmen qyzmet etip, toq júrgenge eshteńe jetpeıdi ǵoı.