Aqtaýda 7 jyl boıy bos turǵan planshet zaýytynyń ǵımaraty 105 mıllıon teńgege satyldy. Mańǵystaý óńirlik komýnıkasıalyq qyzmetiniń habarlaýynsha, buryn ǵımaratta alǵashqy qazaqstandyq planshet kompúterleri shyǵarylsa, 2021 jyldan bastap polıpropılen qapshyqtar óndirilmek. Jańa kompanıa hımıalyq jáne qurylys salasyndaǵy kásiporyndarǵa arnalǵan «BIG-BEG» dep atalatyn iri óndiristik qapshyqtarǵa basymdyq beredi. Investısıalyq jobanyń quny 900 mln teńge. 40 jańa jumys orny qurylady.

«Kaspıı» áleýmettik kásipkerlik korporasıasy AQ basqarma tóraǵasy Baýyrjan Qaıratovtyń málimdeýinshe, planshet zaýyty toqtaǵaly bul ǵımarat  atalmysh korporasıa menshiginde. Ǵımaratty kúzetýge jáne saqtaýǵa jyl saıyn 600 myń teńge jumsap otyrǵan.

-«Sáýir aıynda ashyq saýdaǵa shyǵardyq. Tenderge 4 kompanıa qatysyp, eń joǵary baǵa usynǵan kompanıaǵa 105 mıllıon teńgege satyldy. Ǵımarattyń ekinshi tynysy ashylatyn boldy»,-deıdi Baýyrjan Qaıratov.

Polıpropılen qapshyq shyǵaratyn zaýyt dırektorynyń mindetin atqarýshy Erkebulan Baımoldınniń aıtýynsha, zaýyt jylyna 250-den 500 myń qapshyqqa deıin óndiretin bolady.

-«Qazir aımaqtaǵy bıtým, sement, mıneraldy tyńaıtqysh sıaqty kóptegen zattardy shyǵaratyn kásiporyndar qajetti qapshyqty shetelden satyp alyp otyr. Bizdiń ónim shyqsa, ımportqa degen táýeldilikten arylady degen oıdamyz. Bolashaqta ishki naryqpen qatar, eksportqa shyǵý da josparda bar»,-deıdi Erkebulan Baımoldın.

Kompanıa basshylary óndiristi kelesi jyldyń aıaǵynda iske qosyp, polıpropılen qapshyqtardy 2021 jyldan bastap shyǵarýdy kózdep otyr.