Parıjde 5,5 saǵatta sozylǵan «normand tórttiginiń» kelissózi aıaqtaldy. Sonymen Makron, Merkel, Zelenskıı jáne Pýtın Donbass aýmaǵy boıynsha qandaı sharalardy júzege asyratyn boldy? Parıj kelisimi boıynsha ortaq komúnıkege qol qoıyldy. Bul týraly RIA Novostı habarlady .........

Sonymen «Qaqtyǵys aımaǵyndaǵy jaǵdaıdy jedel retteý týraly», «Mınsk kelisimi boıynsha saıası jaǵdaıdy júzege asyrý týraly» jáne «Jalǵasy bar» dep atalatyn komúnıkege qol qoıyldy.

Qol qoıylǵan kelisim boıynsha tutqynǵa túsken eki jaqtyń barlyq azamattary keler jyldyń sońyna deıin túgeldeı keri qaıtarylady. Donbass aýmaǵyna erekshe mártebe beriledi. Sondaı-aq 2020 jyldyń naýryz aıynan bastap, Donbastyń shekara beketinen adamdar ary-beri erkin qatynaý úshin úsh pýnkt ashylady. Al tutqyndardy almastyrý jumysyn Qyzyl kres qoǵamynyń ókilderi júzege asyrady. Donbass aýmaǵynda jergilikti máslıhattyń saılaýy ótedi.  

Endi «normand tórttigi» tórt aıdan keıin qaıtadan kezdesedi.

Reseı prezıdenti Parıjdegi kezdesýdi «óte paıdaly» dep atady. Sonymen qatar, ol Germanıa men Fransıa basshylaryna alǵys aıtty.

–Bul kezdesý eki el úshin de, sonymen qatar, búkil Eýropa qurlyǵy úshin óte mańyzdy. Biz máseleni sheshýde durys baǵytta kele jatyrmyz,-dedi Vladımır Pýtın.

Al Ýkraına prezıdentiniń ýáji qandaı?

–Naqty jasalǵan qadamdar ǵana shıelenisken jaǵdaıdy durystaıdy. Bul álem halqy úshin de óte mańyzdy nárse. Biraq samıt barysynda sheshilmegen biraz máseleler qaldy. Ol keleshektiń enshisinde. Muny biz aldaǵy ýaqytta birlesip otyryp sheshemiz dep oılaımyn. Donbass aýmaǵynda bolatyn jergilikti máslıhattyń saılaýy tek qana Ýkraına Konstıtýsıasy boıynsha jáne OBSE standarttaryna saı  ótýi kerek,– dedi Ýkraına prezıdenti Vladımır Zelenskıı.

Endi az ýaqyttan soń qol qoıylǵan kelisimdi júzege asyrý bastalady.

Bul bılikke kelgenine birer jyl bolǵan Ýkraına prezıdenti úshin jeńis pe? Vladımır Zelenskıı bul kezdesýdi «jeńis te, jeńilis te emes, teń túsý» dep baǵalady.

Soǵan qaraǵanda, Zelenskıı beıbitshilikke qaraı bir qadam ilgeri basqanyna qýanǵan tárizdi. Biraq qalaı aıtqanda da bul jeńis emes. Memleketińniń jerin bireý basyp alyp, oǵan statýs áperý týraly másele kóterip jatsa, onyń nesi jaqsy deısiń?!

...Qudaı saqtasyn!