Bundaı oıdy Túrkistanda mektep aýmaǵyndaǵy dárethanany kúzetý mindeti júktelgen muǵalim – Bahyt Kaýkenov pen Túrkistan qalalyq polısıa basqarmasynyń basshysy Danıar Meıirhan arasynda bolǵan daýly oqıǵaǵa qatysty Shalqar Nurseıitov atty facebook qoldanýshysy jazdy.

"QR azamaty ári Túrkistan oblysynyń týmasy, muǵalimniń balasy, “Saıasattaný” jáne “Strategıalyq komýnıkasıa” mamandyqtary boıynsha dıplomy bar adam retinde “Podpolkovnık Meırhan Vs Ustaz Keýkenov” keısi jaıly oıymdy jazyp otyrmyn. Osy post keıbir kisilerdiń kóńiline, kisiligine tıip ketse, aldyn ala sorrı.

Eń aldymen, QR azamaty retinde aıtarym – polıseılerdiń eshbir negizsiz beıbit adamdarǵa kúsh qoldanýynyń, adam quqyǵyn kóz aldymyzda kún saıyn taptaýynyń normaǵa aınalýyna bılikpen birge meniń de úlesimniń bar ekenin jaqsy túsinemin. Óıtkeni men kóp jaǵdaıda sharasyzdyq pen qorqynyshtyń saldarynan ózge otandastarynyń quqyǵy buzylǵan kezde nemquraılyq tanytatyn, formadaǵy adamdardy kórgende boıyn jaısyzdyq bıleıtin kóptiń birimin. Dúmshe-azamatpyn.

Biraq NKVD-ny eske salatyn myna jaǵdaıda úndemeı qalýymdy dúmshe-azamatpyn deýmen aqtaı almaspyn. Óıtkeni búgin ustaz Baqyt Keýkenovke týǵan kún erteń meniń basyma, arǵy kúni sizdiń basyńyzǵa týmasyna eshqandaı kepil joq. Sondyqtan árbirimiz zań ústemdigin ornatýǵa asyqpasaq, óz quqyǵymyzdy qorǵap úırenbesek, quqyǵy aıaqasty bolǵan otandastarymyzǵa qoldaý bildirýdi ádetke aınaldyrmasaq, kún saıyn bılikten reformanyń ımıtasıasyn qoıyp, naqty sheshimder qabyldaýdy talap etpesek, atqaminerlerge qolda bar múmkindikterdi paıdalanyp, zań sheńberinde qysym jasamasaq, “meırhandar” men “ýsenovterdiń” jyryn jyrlap júrgenimiz júrgen.

Muǵalimniń balasy retinde aıtarym – muǵalimniń statýsyn muǵalimniń ózi ǵana kótere alady. Qurmetti apaılar! Ustazdyń abyroıyn kóterýdiń alǵashqy qadamy «Muǵalim statýsy» jaıly zańdy qabyldaýdan emes, mektepte komısıa úshin, remont úshin aqsha jınaýǵa ujym bolyp qarsy shyǵýdan, saılaýda býma búletendi jáshikke tastamaýdan, kollektıvtegi únemi óz quqyǵyn qorǵaýǵa tyrysatyn 3-4 muǵalimdi jaý kórýdi doǵarýdan, áriptesińizdiń quqy taptalǵanda “solıdarnost tanytýdan, mekteptegi kásipodaq uıymyn qaıta qurýdan bastalady. Al Túrkistan oblysynyń týmasy retinde aıtar bolsam, mıllıon teńgemen jáne satyp alǵan dıplommen mektepke jumysqa turý – “ustazdyq etý” degen qasıetti uǵymǵa qurmetsizdik jáne balalardyń bolashaǵyna qastandyq.

Eń bastysy, dál qazirgi jaǵdaıda mektep muǵaliminiń statýsyn prezıdent Toqaev ta, mınıstr Aımahambetov te, shýdy basý úshin Keýkenov myrzadan keshirim suraýdy uıymdastyryp júrgen Túrkistan ákimi R.Aıýpov ta kótere almaıdy. “Feısbýkta M.Abenov bar ǵoı!” deısiz be? Mamandyǵy boıynsha muǵalim, kezinde Bilim jáne ǵylym vıse-mınıstri bolǵan, Facebook-ta kúnine bir ret mınıstr Birtanovtyń “otstavkasyn” talap etpese, sháıi batpaıtyn Mýrat Abenovten úmit kútpeńizder. Ol kisige qarapaıym muǵalimniń statýsy kóterilgennen góri, áke jolyn qýyp, karerasy jaryq jyldamdyǵymen ósip kele jatqan talantty polıseı D.Meırhannyń tez arada İshki ister mınıstri bolǵany mańyzdyraq sekildi.

Saıasattanýshy retinde aıtarym – qazirgi saıası rejımniń tıimsizdigi, Túrkistandaǵy oblys jáne qala basshylyǵynyń olqylyǵy men qalalyq polısıa bastyǵy D. Meırhannyń bassyzdyǵy sebep bolǵan bul oqıǵa bılik pen halyqtyń qarym-qatynasynyń jarqyn kórinisi. “Obrazno” aıtsaq, osy jaǵdaıda general-maıor Meırhan Jamanbaevtyń balasy podpolkovnık Danıar Meırhan bıliktiń, al saýatsyz saıasattyń, ádiletsizdik pen dórekiliktiń qurbany bolǵan mektep muǵalimi B.Keýkenov qarapaıym halyqtyń rólinde. Sondaı-aq “bıliktiń ókilimiz” dep keýdesin soǵatyn, beıbit sherýlerde saıası belsendilerge kúsh kórsetetin, shashpen birge bas alýǵa daıyn keıbir polıseılerdiń eń kónbis áleýmettik top sanalatyn muǵalimderge ses kórsetýi – elimizdiń saıası damýy úshin óte qaýipti sıgnal. Iaǵnı, bılik óziniń qamaly sanaıtyn polıseıler qazirgi rejımniń ǵumyryn uzartýǵa atsalysýdan buryn, óz bassyzdyǵy arqyly halyqty ashyndyryp, “sirińkeniń” fýnksıasyn atqarýy ábden múmkin.

Al osy keıste İshki ister mınıstrliginiń qandaı sheshim qabyldaıtyny jáne bolashaqta Meırhan myrzanyń kareralyq traektorıasy qandaı bolatyny óte mańyzdy. Óıtkeni bul jaǵdaı prezıdent Toqaev aıtyp júrgen “estıtin memlekettiń”, bıliktiń “quqyq qorǵaý organdaryn reformalap jatyrmyz” degen sózderin is júzinde taǵy bir ret tekserýge múmkindik. Eger podpolkovnıkti shý basylǵansha ýaqytsha qyzmetten shektetip, keıin oǵan karerasyn jalǵastyrýǵa múmkindik berilse, onda ózin qazir “Papa goroda (Týrkestana)” atap júrgen D.Meırhannyń 10-15 jyldyń ishinde MVD-ny basqaryp, “Papa strany” bolǵanyn kórip qalýymyz múmkin. Oǵan D.Meırhannyń Facebook pen Instagram-daǵy myńdaǵan fanattary qýana-qýana kelisetin sekildi.

Strategıalyq komýnıkasıa mamany retinde aıtarym – jalǵan dúnıege negizdelgen áleýmettik jelidegi ımıjdiń “ǵumyry” tym qysqa. Qazaqstanda áleýmettik jelide belsendi bolǵany úshin “halyqqa jaqyn sheneýnik” degen statýstyń jaramdyq merzimi ary ketse 4-5 jyl. Ómirde “papasynyń derzkıı balasy” bolyp, ınternette “halyq úshin jan pıda” deıtin azamattyń keıpin uzaq ýaqyt ustap turý qıyn. Al osy 4-5 jyldyń ishinde respýblıkalyq deńgeıde “narodnyı ı kreatıvnyı” ataný da, arttyń ashylyp qalýy da op-ońaı. Qazaqsha aıtqanda, ótiriktiń quıryǵy bir-aq tutam. Komýnıkasıa tilimen aıtsaq, ótirik ımıjdiń quny bir-aq vıdeo/foto/post. Keıde podpolkovnık Meırhan sekildi sheneýnikterdiń ózderi jeńil ataq pen abyroıdy Instagram-daǵy tikeleı efırden izdeımin dep betperdesin ózi ashyp alýy múmkin. Ondaı kezde Aıgýl Soloveva apaı da (https://www.ktk.kz/ru/news/video/2017/03/16/76948/), Mýrat Abenov aǵaı da kómektese almaıdy. Tipti siz generaldyń balasy bolsańyz da.

P.S. Podpolkovnık Meırhan (aka “Papa goroda”) 10 qazanda óziniń Instagram paraqshasynda muǵalimge qurmet kórsetý jaıly rolıkti bólisip, “Balalarymyz bizdiń is-áreketterimizdi qaıtalaıtynyn esten shyǵarmaıyq. Olarǵa jeke bastyq úlgimen neniń “jaqsy” neniń “jaman” ekenin kórsetý kerek” dep jazǵan eken (tómendegi skrınshottardy qarańyz). Ashyq derekterge súıensek, D.Meırhan – úsh balanyń ákesi. Myna bassyzdyǵy arqyly podpolkovnık myrza Facebook pen Instagram-da «odın ız lýchshıh ı chestnyh polıseıskıh strany» bolýdan ábden sharshap, “jeke bastyq úlgimen” úsh balasyna ǵana emes, búkil elge neniń “jaman” ekenin” kórsetýdi oılasa kerek-ti. Eger oıy sol bolsa, onda ol tapsyrmany “+5”-ke oryndap shyqty deýge bolady, – delingen jazbada.

Eskerte ketelik, 13 jeltoqsan kúni Túrkistan qalasynda dene shynyqtyrý pániniń muǵalimi Bahyt Kaýkenov mektep aýmaǵyn kúzetýge kezekshilikte turǵan. Aýa raıy jańbyrly bolǵandyqtan mektepke kirgeninde polısıa kúzetshilik barysyn tekserýge kelip qalǵan. Ornynda bolmaǵan muǵalimge polısıa qyzmetkerleri dóreki sóılep,  arada janjal týǵan. Polıseıdiń muǵalim qolyn qaıyryp, polısıa kóligine salyp jatqan tusyn mektep qyzmetkerleri vıdeoǵa túsirip, áleýmettik jelige taratqan. Vıdeodaǵy polıseılerdiń biri Túrkistan qalalyq polısıa basqarmasynyń basshysy Danıar Meıirhan tergeý júrgizý kezinde qyzmetinen ýaqytsha bosatyldy.