Toqaevtyń Ulttyq keńesinde kóterilgen máselelerden eshqandaı ózgeris bolmaıdy. Alǵashqy kezde aıtqandaı-aq, bul bolmashy ǵana «kosmetıkalyq» ózgerister.

Birinshiden, mıtıńilerdi ruqsat alýdan eskertý formasyna aýystyrý boıynsha. Bul tek qana jalpylama usynys. Áli parlamenttiń qaraýyna barady. Ol zań túrinde qabyldanyp, bekitkenshe, onyń ishine talaı quıtyrqylyqtardy engizetinine kúmánim joq. Mysaly, Almaty qalasynda mıtıńi ótkizýge ekinshi jer retinde Gandı parkin usynyp jatyr. Nege mıtıńi ótkizý bir jerge baılanýy tıis? Beıbit jıyndy kez kelgen jerde, tek qana strategıalyq mańyzy bar áskerı nysandardyń janynda ótakizýge bolmaıdy dep jazylýy kerek qoı. Odan keıin mıtıńiler týraly jańa zańda — uıymdastyrýshylar materıaldyq mindetteme alýy kerek degen másele kóterilgen. Iaǵnı, mıtıńini ótkizesiz, artynsha sol mańaıda ornalasqan kafeler, meıramhanalar, komýnaldyq qyzmetter sizge qarsy mıllıondaǵan aıyppuldar salǵyzady. Sizdiń kesirińizden «jumysymyz toqtady, shyǵyn keldi jáne t.b». Reseıde osy prınsıp qatty jumys isteıdi. Sońǵy másele — Alekseı Navalnyıǵa mıtıńi ótken mańaıdaǵy restoran ıesi birneshe mıllıon aıyppul saldyrǵan. Kóresizder, osyǵan uqsas shekteýdi bul zańǵa da kirgizedi.

Ekinshiden, saıası partıalardy tirkeý týraly. 40 myńnan 20 myńǵa túsirdi dep bórikti aspanǵa atatyndaı emes. 40 myńnan 1 myńǵa túsirse, túsinikti bolar edi. Partıa tirkeýdegi negizgi másele — qol jınaýda ǵana emes. Onyń basqa da búrokratıalyq tosqaýyldary kóp — bastamashyl top qurý, qol jınalyp bolǵan soń Ádilet mınıstrliginiń jaýap berý merzimin naqtylaý jáne t.s.s. Al bul týraly bir sóz joq.

Úshinshiden, saılaý týraly, BAQ týraly, saıası tutqyndar týraly bir aýyz sóz aıtylmady.
Demek, Ulttyq keńes jumysynyń nátıjesi — kózboıaýshylyq, nólge teń deýge bolady. Onyń quramynda men ózim syılaıtyn tulǵalar bar. Bul keńes jumysynyń nátıjesiz bolýy, árıne, 100 paıyz olarǵa baılanysty emes, másele — saıası júıede. Búgingi jıynnyń qorytyndysy — elde eshqandaı kúrdeli saıası reformalar Nazarbaevtyń tusynda bolmaıdy degen sóz.

Janbolat Mamaıdyń facebook paraqshasynan alynǵan