Sybaılas jemqorlyqqa  qarsy is-qımyl agenttiginiń Túrkistan oblysy boıynsha  Departamentiniń bastamasymen qurylǵan «Meıirimdilik nury» aksıasy sheńberinde Arys qalasyndaǵy «T.Tájibaev atyndaǵy otbasy úlgisindegi balalar aýylynyń»  jasóspirimderimen  «Qosh keldiń, Jańa jyl!» merekelik sharasy atap ótildi. 

  Merekelik sharanyń negizgi maqsaty – balalardy shattyq shýaǵyna bólep, kóterińki-kúıge keneltý jáne  aıryqsha kóńil bólý arqyly olardyń ómirge degen ynta-jigerin arttyrý.

 İzgilikke  toly merekelik sharada Sybaılas jemqorlyqqa qarsy is-qımyl agenttiginiń Túrkistan oblysy boıynsha departamentiniń basshysy Hakım Kóshqalıev  sóz alyp, balalar aýylynyń tárbıelenýshilerine júrekjardy ystyq lebizin bildirdi.    

Jańa jyldyq shyrshanyń shamy jaǵylǵan kóńildi keshte talantty  balalar úzdik sahnalyq qoıylymdaryn  qoıyp,   mazmunǵa toly jyr-destelerin oqydy. Bulbul daýysty búldirshinder  áýelete  án salyp, qyrmyzy qyzdar myń burala bı bıledi.   

Balalardyń shat kúlkisine bólengen keshte Arys qalasynyń ákimi  Murat Bolatuly atalǵan balalar aýylynyń dırektory Merýert Súındikovaǵa aıryqsha  alǵys aıtyp, tárbıelenýshilerdiń jańa jylda jarqyn jetistikterge jete berýlerine tilektestik  bildirdi. 

         Shattyqqa toly shara barysynda shat-shadyman kúı keshken balaqaılar  Óskemen qalasynda ornalasqan «Úmit» balalar úıiniń tárbıelenýshilerimen telekran arqyly tikeleı baılanysqa shyǵyp, aıtýly merekemen quttyqtaýǵa jáne  aqjoltaı tilekteri men ystyq yqylastaryn bildirýge múmkindik aldy. Sondaı-aq, «Úmit» balalar úıiniń túlekteri merekelik sharaǵa arnaıy qonaq bolyp, búldirshinderge arnaıy jańa jyldyq   tosynsyıyn tartý etti. 

Bezendirilgen bıik shyrshany aınala bılegen balǵyndar Aıaz ata qorjynynan dám tatyp, este qalar ǵajaıyp sáttiń kýási boldy.

Aıta ketsek, qyrkúıek aıynan bastap 62-jetkinshekti  óz qamqorlyǵyna alǵan Departament qyzmetkerleri qoǵamnyń qundy bólshegi – balalarǵa  tátti syılyqtaryn úlestirip, olardy árkez qoldaýǵa  daıyn ekendikterin jetkizdi.