Shyǵys Qazaqstan oblysynda kólik apaty bolyp, bir adam qaza tapty. Bul týraly SHQO polısıa departamentiniń baspasóz qyzmeti habarlady. 

Departamenttiń habarlaýynsha, kólik apaty Glýbokoe aýdanynda "Óskemen – Rıdder" tasjolynyń 65-shaqyrymynda, Zımove aýylynan 500 metr jerde bolǵan.

"28 jastaǵy "Toyota Carina" júrgizýshisi Óskemenge bara jatqan. Róldi ıgere almaı qalǵan júrgizýshi qarsy jolǵa shyǵyp, 67 jastaǵy azamat júrgizip kele jatqan "Subaru Forester" kóligine soqtyǵysqan" - delingen SHQO polısıa departameti taratqan habarlamada.

Departamen málimetishe, apat saldarynan "Toyota Carina" kóliginiń 37 jastaǵy jolaýshysy oqıǵa ornynda qaza bolǵan. Úsh jolaýshy, onyń ekeýi kámelet jasyna tolmaǵan balalar ártúrli dene jaraqatymen medısınalyq mekemege jetkizilgen.

Polısıa Qylmystyq kodekstiń 345-baby, 3-tarmaǵy boıynsha sotqa deıingi tergeý jumystaryn bastady. Qajetti saraptama jumystary júrgizilip jatyr.