Áleýmettik jelide "Qytaıdaǵy vırýs Almatyǵa jetti" degen aqparat pen vıdeo taralyp, qyzý talqylanyp jatyr. Alaıda Qazaqstannyń densaýlyq saqtaý mınıstrligi bul aqparattyń jalǵan ekenin málimdedi.

Mınıstrliktiń habarlaýynsha, áleýmettik jelide taraǵan vıdeo Taldyqorǵadaǵy aýrýhanalardyń birinde ótken oqý-jattyǵýdan kórinis, sondyqtan turǵyndardyń alańdaýyna esh negiz joq.

"Búgin Taldyqorǵan qalasyndaǵy aımaqtyq ınfeksıalyq aýrýhanada adam ómirine qaýipti vırýs juqtyrǵan pasıentke kómek kórsetý týraly josparly túrde oqý-jattyǵý jumystary júrgizildi. Oqý-jattyǵý jumystary Densaýlyq saqtaý basqarmasy men Almaty oblysy taýarlar men kórsetiletin qyzmetterdiń sapasy men qaýipsizdigin baqylaý departamentiniń uıymdastyrýymen ótkizildi. Turǵyndardyń alańdaýyna esh negiz joq. Áleýmettik jelilerde negizsiz aqparattyń taralýyna jol bermeýlerińizdi suraımyz" delingen densaýlyq saqtaý mınıstrliginiń habarlamasynda. 

Ótken jyldyń aıaǵynda Qytaıda belgisiz vırýs tarap jatqany aıtyla bastady. Koronovırýs dep atalǵan bul vırýs Qytaıdyń Ýhan jáne Hýangen qalalarynda kóptep taralǵan. Soǵan baılanysty Qytaı bıligi bul eki qalany japty. Ázirge pnevmonıaǵa uqsas dertke shaldyqtyratyn vırýstyń qaıdan shyǵyp jatqany belgisiz. 2002 jyly osyǵan uqsas vırýstan Qytaı men Gonkongte 600-den astam adam ólgen.

23 qańtarda Dúnıejúzilik densaýlyq saqtaý uıymy (DDSU) Qytaıda ınfeksıanyń taralýyna baılanysty densaýlyq saqtaý salasynda tótenshe jaǵdaı jarıalaýdan bas tartty. DDSU-nyń basshysy Tedros Adzhnom Gebreıesýstyń aıtýynsha, mundaı sheshim qabyldaý úshin áli kóp derek jınaqtalýy tıis.