Búgin, 26 qańtarda Kanadanyń Monreal qalasyndaǵy "Montreal Casino" arenasynda meksıkalyq Rıkardo Laraǵa (22-7, 10KO) qarsy jekpe-jek ótkizgen qazaqstandyq kásipqoı boksshy Batyr Júkembaev merziminen buryn jeńiske jetti.
Birinshi jartylaı orta salmaqta (63,5 kg) ótken kezdesý 10 raýndqa josparlanǵan edi. Alaıda Júkembaev qarsylasyn ekinshi raýndta eki ret nokdaýnǵa jibergen soń meksıkalyq boksshynyń sekýndanttary jekpe-jekti jalǵastyrýdan bas tartty.
Bul - 28 jastaǵy Júkembaevtyń kásipqoı bokstaǵy 18-jeńisi. Buǵan deıin 17 jekpe-jek ótkizgen ol barlyǵynda jeńiske jetken. 13 kezdesýde qarsylastaryn merziminen buryn utqan. Sońǵy ret ol ótken jyly qyrkúıek aıynda meksıkalyq Mıgel Vaskesti jeńgen edi.
Júkembaev kásipqoı boksshylardyń reıtıńin jasap otyratyn Boxrec saıtynyń tizimi boıynsha óz salmaǵyndaǵy 1690 boksshynyń arasynda 19-orynda kele jatyr. Ol WBC tujyrymy boıynsha 14-i, al IBF tujyrymy boıynsha 15-satyda tur. Qazaqstandyq boksshyda qazir óz salmaǵyndaǵy İVO International, WBC Continental Americas, WBA Continental, IBF Inter-Continental chempıondyq belbeýleri bar. Biraq bul belbeýlerdiń barlyǵy kásipqoı boksta úshinshi, tórtinshi dárájeli sanalady.
Batyr Júkembaev - Jambyl oblysy Shý aýdanynyń týmasy. Ol 2015 jyldan beri kásipqoı boksta júr. Qazaqstandyq boksshy "Eye of the tiger management" promoýterlik kompanıasymen jumys isteıdi. Kanadanyń Monreal qalasynda turatyn Júkembaev kásipqoı bokstaǵy barlyq jekpe-jegin osy memleket aýmaǵynda ótkizip júr.
