Qordaı óńirinde keshe bolǵan qaqtyǵys týraly belgili zańger Aıgúl Orynbek óz oıyn ortaǵa saldy. "Sóz basyn alystan oraǵytpaı, ýshyqqan jaǵdaıdy naqtylaı kele: nátıje kórsetetin  zań bar, degenmen sol zańdy iske asyrýshylar óz isterine ústirt qaraıdy" dep bastaǵan zańger Facebook paraqshasynda eń aldymen bolǵan jaıtqa kinálilerdi tizbektep aıtyp berdi.

"1. Bul janjalǵa eń basty kináli adamdar polısıa qyzmetkerleri. Ózderin qorǵaýǵa shamalary jetpese, halyq olarǵa qalaı senim artady. Eń soraqysy, áleýmettik jelilerde taıaq jep jatqan quziretti organ qyzmetkerleriniń vıdeo-sýretteri keńinen taralýda.

2. Aqparat taratýdan tym shette qalyp kelemiz. Aqparat mınıstri Abaev saǵat 16:00 oryn alǵan oqıǵany ábden sozyp, túngi  saǵat 12-de áreń berdi. Abaevtyń kóp kúttirgen sózinen de ile-shala Jambyl oblysynyń baspasóz qyzmeti arqyly áıtip-búıtip jatyp qulaǵdar boldyq! Forým ótkizip aqparattyń túrli joldaryn aıtqanda bále deımiz. Al iske kelgende kózge kórinerlik nátıje joq! 200 mıllıonǵa Reseıdiń bloger, jýrnalıserin shaqyryp sabaq úırenip júrgen Abaev bul joly da eshteńe úırenbegeniniń kórinisi.

3. Bul oqıǵa búkil ákimderge men polısıa qyzmetkerlerine sabaq bolý kerek! Halyq tarapynan túsken eshqandaı aryz qaralyp jatqany shamaly. Sonyń kesirinen ózge ulttardyń arasynda dúrbeleń bastalady. Fırdaýsı aýylyn da tilge tıek etsek bolady. Asyqpasaq, ár istiń sońy osyndaı túıitkildi problemalarǵa ulasa beretin bolady.

4. Ulttyń jamany bolmaıdy. Tek ishinen sondaı bireýleri shyǵady. Qansha jerden ashý qysyp, ishimizge syımaı bara jatsa da, biz qatigez emespiz. Ózgeniń dárejesine túsip, etken isine jaýyzdyq, qatigezdikpen jaýap qaıtarý bizdiń tektiligimizge nuqsan ketiredi" delingen zańger jazbasynda.