QR Parlamenti Májilisiniń depýtattaryna "Qazaqstan Respýblıkasynyń keıbir zańnamalyq aktilerine memlekettik basqarý deńgeıleri arasynda ókilettikterdi qaıta bólý máseleleri boıynsha ózgerister men tolyqtyrýlar engizý týraly" QR zańynyń jobasy tanystyrylyp jatyr, dep habarlaıdy QazAqparat.

– Zań jobasy memlekettik basqarý júıesin odan ary jetildirý maqsatynda ázirlendi jáne mınıstrlikterdiń, jergilikti atqarýshy organdardyń derbestigi men jaýapkershiligin arttyrýǵa baǵyttalǵan. Zań jobasy jekelegen fýnksıalardy Úkimetten ortalyq memlekettik organdarǵa, sondaı-aq ortalyq memlekettik organdardan jergilikti atqarýshy organdarǵa berýdi kózdeıdi. Zań jobasymen 55 zańnamalyq aktige, onyń ishinde 5 kodekske, 50 Zańǵa ózgerister men tolyqtyrýlar engizý qarastyrylyp otyr, – dedi zań jobasyn tanystyrýǵa arnalǵan otyrysta Májilis depýtaty Nurtaı Sabılánov.

Al zań jobasyn tanystyrǵan QR Ulttyq ekonomıka vıse-mınıstri Aıgúl Shaımovanyń aıtýynsha, Úkimetten mınıstrlikterge 88 ókilettik berilip, mınıstrlikter arasynda 2 fýnksıa qaıta bólinedi. Ortalyqsyzdandyrý jalǵasady. Ortalyqtan óńirlerge 3 fýnksıa beriledi.

– Oblystyq deńgeıden aýdanǵa jolaýshylar kóligin damytýdyń keshendi syzbasyn jáne jol qozǵalysyn uıymdastyrý jobalaryn ázirleý jónindegi ókilettik beriledi. "Ókilettikterdi qaıta bólý ne beredi?" degenge toqtalsaq, eń aldymen Úkimet salalardaǵy saıasatty qalyptastyrýǵa basa nazar aýdaratyn bolady. Memlekettik organdardyń qabyldanǵan sheshimder úshin derbestigi men jaýapkershilik deńgeıi artady. Sondaı-aq olardy qabyldaýdyń jedeldigi arttyrylady, – dedi vıse-mınıstr.