Bılikke qarsy narazylyq jıyndary men mıtıńilerde belsendiligimen kózge túsip, áleýmettik jelide Qazaqstan bıligin jıi synaıtyn qoǵam belsendisi Dýlat Aǵadildiń Nur-Sultan qalasyndaǵy tergeý ızolátorynda jumbaq jaǵdaıda kóz jumǵany onyń jaqtastaryn beıjaı qaldyrmady. Búgin túske qaraı Aǵadildiń qaza bolǵanyn estigen belsendiler Qazaqstannyń birneshe qalasynda qarsylyq jıynyn ótkizdi. Olar Aǵadil "júrek talmasynan qaıtys boldy" degen resmı aqparatqa senbeıtinderin aıtyp, onyń ólimine bılik pen quzyrly organdardy kinálady.  

Dýlat Aǵadildiń qazasyn estı sala jınalǵan elordalyq belsendiler aldymen ol qaıtys bolǵan ızolátorǵa bardy. Ol jaqtan Aǵadildiń ólimine qatysty aqparat ala almaǵan bir top adam Qazaqstan ishki ister mınıstrligi ǵımaratynyń aldyna baryp, mınıstr Erlan Turǵymbaevtyń shyǵýyn talap etti. Bastapqyda mınıstrlik ókilderi jınalǵan belsendilerge Aǵadildiń ólimine qatysty eshqandaı maǵulmat bergen joq. Soǵan narazy bolǵan belsendiler joldy jaýyp tastady. Biraq birneshe mınýttan keıin arnaıy jasaq kelip joldy japqandardyń barlyǵyn alyp ketti. 

Al keshe qaraı elordalyq belsendiler taǵy da mınıstrlik ǵımaratynyń aldyna baryp qarsylyq aksıasyn ótkizdi. Qoldaryna marqum bolǵan belsendiniń sýretin ustap shyqqan olar Aǵadildiń ólimine bılikti kinálap, "Bılik – qanisher!" dep urandatty. 

Nur-Sultandaǵy qarsylyq aksıasyna uqsas Aǵadildiń ólimine baılanysty qarsylyq jıyny Almatyda da ótti. Almatylyq belsendiler de Aǵadildiń ólimine bılikti kinálap, kesh batqansha jalǵasqan qarsylyq aksıasy kezinde marqum belsendiniń sýretin ustap júrdi.

Aǵadildiń ólimine baılanysty qarsylyq jıynyn ótkizgen almatylyq belsendiler. Sýret Qazaqtimes.com saıtynan alyndy.

Almatylyq belsendiler prezıdent Qasym-Jomart Toqaev, qala prokýrory Baýyrjan Júrekbaev pen ishki ister mınıstri Erlan Turǵymbaevtyń atyna aryz jazdy. Olar aryzda Aǵadil ólimine qatysty "tergeýdiń ádil júrgizilýin", pikirine bola "belsendilerdi zańsyz qýdalaýdy doǵarýdy", "saıası tutqyndar men bıylǵy mıtıńilerde qamalǵandardy dereý bosatýdy" talap etti. Talap aryz jazýshylar jaýap organdardyń  BAQ arqyly resmı túrde jaýap berýin suraıdy. 

Dýlat Aǵadildiń qaıtys bolǵany týraly aqparat túski saǵat 12 kezinde tarady. İshki ister mınıstrliginiń aldyn ala málimeti boıynsha, Aǵadil júrek talmasynan qaıtys bolǵan. Resmı saraptama erteń daıyn bolady. 

Dýlat Aǵadil áleýmettik problemalar jáne azamattyq quqyqty saqtaý máselesin kóterip júrgen. Ol ótken jyly birneshe márte ákimshilik jazaǵa tartylyp, keminde 60 táýlik qamaýda otyrǵan. 

43 jastaǵy belsendi qarashanyń ortasynda ákimshilik qamaýda otyrǵan Selınograd aýdandyq tergeý ızolátorynan qashyp ketken edi. Keıin ol áreketiniń sebebin "zańsyz qýdalaýǵa qarsylyǵym" dep túsindirgen. Polısıa eki kún boıy izdegen belsendi 15 qarashada ózi bas prokýratýra aldyna kelgen. Keıin ol "sot qaýlysyn oryndamaǵany úshin" taǵy 6 táýlikke sottalǵan edi. Aǵadildiń artynda áıeli men alty balasy qaldy.