25 aqpan kúni túske taman Nur-Sultan qalasyndaǵy tergeý ızolátorynda qamaýda otyrǵan qoǵam belsendisi Dýlat Aǵadildiń qaıtys bolǵany habarlandy. Resmı aqparatqa saı, belsendi júrek talmasynan kóz jumǵan. Keshke qaraı marqumnyń qorǵaýshysy Baýyrjan Azanov facebook paraqshasyna kezdeısoq máıithanaǵa kelip, Dýlat Aǵadil máıitin ashyp jatqanyna kýá bolǵanyn jazdy. Qamshy tilshisine pikir bildirgen zańger táýelsiz sarapshylardyń qatysýymen sot-medısınalyq saraptama jasalatynyn málim etti.

Qorǵaýshynyń aıtýynsha, máıitti ashý jumystary erteń 10:00-de jalǵasady.

– Sot-medısınalyq saraptamaǵa táýelsiz sarapshylar qatysatyn boldy. Biz – marqumnyń týystary, dostary, qorǵaýshylar bolyp eki táýelsiz sarapshyny taptyq. Tergeý amaldaryna atalǵan sarapshylardy qatystyrý týraly ótinishimdi qanaǵattandyrdy. Endi aıtqandarynda turyp, sarapshylardy qatystyrady dep úmittenip otyrmyz, – deıdi zańger.

Zańger Dýlat Aǵadil ustalǵan kezde mas boldy degenge kúmánmen qaraıtynyn aıtty.

– Dýlat Aǵadildi ustaǵan kezdegi beınejazbany kórdim. Onyń áreketteri mas adamdikine uqsamaıdy. Álbette men maman emespin, biraq máıitti  ashý kezinde spırt ıisin sezbedim. Onyń ústine men ishimdik, esirtki tutynatyn adamdy áreketine qarap, birden bile qoıamyn. Maǵan adamnyń alkogóldik sýsyndardy ishetinin ne ispeıtinin anyqtaý qıyn emes. Menińshe, ol vıdeoda mas emes. Dýlat tergeý ızolátoryna túskende onyń jaı-kúıi qandaı bolǵanyn bilgim kelip, ol mas bolsa, sony rastaıtyn qujatty, Dýlat Aǵadildiń qoly qoıylǵan qujatty kórsetýlerin suradym. Onyń mastyǵyn rastaıtyn qujatty maǵan kórsetken joq, – deıdi Baýyrjan Azanov.

Zańger Abzal Quspan da táýelsiz sarapshylar kómegine júginý qajettigin atap ótti.

– Dýlat Aǵadildiń qazasy – otbasy úshin ǵana emes, qoǵam úshin úlken qaza. Sizder arqyly týǵan-týystaryna qaıǵyryp kóńil aıtqym keledi. Tas batqan jerine aýyr ǵoı. Jaqyndary jylap, joqtap jatyr. Jerleý rásimine daıyndalýda degendeı. Jetisin, qyrqyn uıymdastyrý kerek. Biraq osyndaı aýyr jaǵdaıǵa qaramastan, zańdyq múmkindikterdi qarastyrý qajet. Mindetti túrde jábirlenýshilerdiń quqyǵy qorǵalýǵa tıis. Ony elordada júrgize alatyn azamattardyń biri – Baýyrjan Azanov. Sondaı senimdi, qoǵamǵa belgili quqyqqorǵaýshylar máseleni baqylaýyna alyp, táýelsiz sarapshylardy tartýǵa tıis, – dedi ol.

Abzal Quspannyń sózinshe, Qazaqstanda sot-medısınalyq saraptamalardyń barlyǵyna birdeı sene berýge bolmaıdy.

– Eger Qazaqstannyń sot-medısınalyq saraptamasyna senetin bolsaq, onda Zamanbek Nurqadilov ózin úsh ret júrek tusynan, bir ret basynan atyp ólgen. Bul – Qazaqstannyń sot-medısınalyq saraptamasynyń shyǵarǵany. Sondyqtan sot-medısınalyq saraptamaǵa táýelsiz mamandar qatysýy kerek. Men solar qatysqan saraptama qorytyndysyna, táýelsiz sarapshylar aıtsa ǵana senemin. Al Nur-Sultan qalasy İshki ister departamentiniń resmı málimdemesine óz basym senbeımin, – degen zańger marqum týraly ustalǵan sátte mas bolypty degen aqparattar anyqtalýy kerek ekenin atap ótti.

– Prosedýraǵa saı Dýlat Aǵadildiń mas kúıde bolǵany ol tergeý ızolátoryna qamalmaı turyp anyqtalýy kerek. Izolátorǵa túsken azamattyń densaýlyǵy sanıtarlyq bólim qyzmetkerleri tarapynan mindetti túrde tekseriledi. Sonyń qorytyndysyn, sonda ne jazylǵanyna qaraý kerek. Ol qujatta Dýlat Aǵadildiń qoly bolýy qajet, – deıdi quqyqqorǵaýshy.

Zańger Abzal Quspan marqumnyń quqyqqorǵaýshysy Baýyrjan Azanov "maǵan kórsetpedi" degen qujatty aıtyp otyr.

Dýlat Aǵadil kózi tirisinde bılikke qarsy narazylyq jıyndar men mıtıńilerde belsendiligimen kózge túsip, áleýmettik jelide Qazaqstan bıligin jıi synaǵan. Ótken jyly birneshe márte ákimshilik jazaǵa tartylǵan.2019 jylǵy  qarashanyń ortasynda ákimshilik qamaýda otyrǵan Selınograd aýdandyq tergeý ızolátorynan qashyp shyǵyp, keıin ol áreketiniń sebebin "zańsyz qýdalaýǵa qarsylyǵym" dep túsindirgen. Polısıa eki kún boıy izdegen belsendi 15 qarashada ózi bas prokýratýra aldyna kelgen. Keıin ol "sot qaýlysyn oryndamaǵany úshin" taǵy 6 táýlikke sottalǵan.

Qoǵam belsendisiniń tergeý ızolátorynda jumbaq jaǵdaıda kóz jumǵany onyń jaqtastaryn beıjaı qaldyrmady. Búgin túske qaraı Aǵadildiń qaza bolǵanyn estigen belsendiler Qazaqstannyń birneshe qalasynda qarsylyq jıynyn ótkizdi. Olar Aǵadil "júrek talmasynan qaıtys boldy" degen resmı aqparatqa senbeıtinderin aıtyp, onyń ólimine bılik pen quzyrly organdardy kinálady.

♦  Oqı otyryńyz: Dýlat Aǵadildiń anasy: Azanovqa esh renjimeımin, tek mazalamasa eken (vıdeo)