«Nur Otan» partıasynyń Qyzylorda oblystyq fılıalynyń kezekten tys konferensıasy barysynda Gúlshara Ábdiqalyqova partıanyń oblystyq fılıalynyń tóraǵasy bolyp saılandy. Elimizde koronavırýspen kúres jaǵdaıyna baılanysty shekteý sharalary engizilgendikten, partıanyń bul konferensıasy alǵash ret onlaın rejımde ótkizildi.

Bas qosýǵa beınekonferens baılanysy arqyly qatysyp, sóz sóılegen Baýyrjan Baıbek qazirgi kezdegi ahýalǵa toqtalyp, partıa lıderi Nursultan Nazarbaevtyń tapsyrmasymen «Nur Otan» partıasynyń qyzmeti qaıta baǵdarlanǵanyn atap ótti. Partıanyń búkil resýrsy el Prezıdenti Qasym-Jomart Toqaevtyń bastamasymen qolǵa alynǵan koronavırýspen kúres jaǵdaıynda muqtaj qazaqstandyqtarǵa kómek uıymdastyrý sharalaryn qoldaýǵa jumyldyryldy.

«Elbasy búgin jaryq kórgen maqalasynda «Ár mınıstr, árbir oblys, qala jáne aýdan basshylary júıemen, tártippen, úılesimmen, naqty josparmen, nyq senimmen áreket etip, ýaqytsha qıyndyqtan shyǵýǵa barlyq kúsh-qýatty jumyldyrýy qajet. «Nur Otan» partıasynyń músheleri de osy bir saýapty istiń aldyńǵy qatarynan tabylýǵa tıis», - dep qadap turyp tapsyrdy. Sondyqtan partıanyń óńirlik fılıaly osy baǵyttaǵy jumystardy kúsheıtip, Memleket basshysy jarıalaǵan daǵdarysqa qarsy barlyq sharalardyń oryndalýyn qatań baqylaýda ustaý kerek.

Elbasy tapsyrmasyna sáıkes, qazirgi ahýalǵa oraı 13 naýryzdan bastap partıanyń barlyq qoǵamdyq qabyldaý bólmelerinde azamattardy qabyldaý jumystary ýaqytsha toqtatylyp, onlaın rejımge kóshirildi. Búgingi tańda partıaǵa onlaın rejımde ótinish berý 2 esege, Facebook, Instagram áleýmettik jelilerinde - 4 ese, WhatsApp jelisi arqyly - 7 esege artty. Atalǵan máselelerge baılanysty partıanyń aımaqtyq fılıaldaryna áleýmettik jeliler arqyly kelip túsken barlyq ótinishterdi tirkeý jáne qoǵamdyq-saıası jaǵdaıǵa monıtorıń jasaý úshin naqty tapsyrma berilgen. Partıanyń aımaqtyq jáne aýmaqtyq fılıaldary qıyn jaǵdaıǵa tap bolǵan azamattarǵa kómek kórsetý jáne turǵyndardan túsken telefon qońyraýlardy retteý maqsatynda senim telefondary jumystaryn uıymdastyrý qajet» - dedi partıa Tóraǵasynyń Birinshi orynbasary.

Onyń aıtýynsha, Prezıdent tapsyrmasyna sáıkes «Halyq únine qulaq asatyn memleket» konsepsıasy aıasynda partıalyq baqylaý komısıasy men sybaılas jemqorlyqqa qarsy kúres keńesteriniń jumysy kúsheıtilgen. Barlyq óńirlik «Birgemiz» qorlarynda jumys qyzý júrgizilýde. Tek Qyzylorda oblysynyń ózinde 2 myńdaı otbasy ataýly kómekke ıe bolǵan.

Baýyrjan Baıbek jýyrda Qyzylorda oblysynyń ákimi bolyp taǵaıyndalǵan Gúlshara Ábdiqalyqovanyń kandıdatýrasyn partıanyń oblystyq fılıalynyń tóraǵalyǵyna usyna otyryp, onyń Memlekettik hatshy, Áıelder isteri jáne otbasylyq-demografıalyq saıasat jónindegi ulttyq komısıanyń tóraǵasy retinde elimizde genderlik saıasattyń iske asyrylýyna eleýli úles qosqanyn atap ótti.

«Jýyrda Qyzylorda oblysyna Elbasy kelisimimen, Memleket basshysynyń Jarlyǵymen Ábdiqalyqova Gúlshara Naýshaqyzy ákim bolyp taǵaıyndaldy. Ol – elimizde oblys basqarýǵa taǵaıyndalǵan birinshi áıel ákim. Osy Syr óńiriniń týmasy. Elbasy elimizdiń saılanbaly organdarynda áıel azamattardyń úlesin 30%-ke jetkizýdi tapsyrǵanyn bilesizder.  Bul qadam osy úrdiske jaqsy jol ashyp otyr. Sonymen birge Ortalyq apparat qazirgi kezde partıaishilik tańdaý – praımerızdi ótkizýde onlaın-tehnologıany paıdalaný joldaryn pysyqtaýda, sol kezde osyny eskeretin bolamyz», - dedi ol.

Óz kezeginde Gúlshara Ábdiqalyqova partıa lıderi Nursultan Nazarbaev pen parıtıalastarǵa ózine artqan senimderi úshin alǵysyn bildirdi.

«Bizdiń aldymyzda eń birinshi kezekte, Elbasy atap ótkendeı, partıanyń barlyq resýrstaryn prezıdent Qasym Jomart Kemeluly Toqaevtyń basshylyǵymen júzege asyrylatyn jumystarǵa baǵyttaý mindeti tur. Sondyqtan partıa úshin eń mańyzdy másele - osyndaı qıyn kezeńde halyqpen birge bolyp, olarǵa barynsha qoldaý kórsetý» - dedi ol.

Aıta ketý kerek, «Nur Otan» partıasy birshama ýaqyt buryn elimizdegi árbir oblystyń, aýdan men qalanyń aldaǵy 5 jylǵa arnalǵan jańa damý baǵdarlamalaryn ázirleý boıynsha aýqymdy jumys júrgizdi. Atalǵan aımaqtyq damý baǵdarlamalarynda árbir óńirdiń jergilikti ereksheligi eskerile otyryp, árbir azamattyń naqty qajettilikteri kórinis tabady. Elbasynyń tapsyrmasy boıynsha partıa tóraǵasynyń Birinshi orynbasary osy kezge deıin Atyraý, Pavlodar, Túrkistan, Jambyl jáne basqa da oblystardyń shalǵaı aýyldaryna deıin aralap, óńirlerdiń jaı-kúıimen tikeleı tanysyp shyqty. Tek sońǵy jarty jylda ol Qyzylorda oblysynyń birqatar aýdandarynda eki ret bolyp, turǵyndarmen kezdesti.