Munaı baǵasynda búgin tarıhta bolmaǵan antırekord tirkeldi. Qara altynnyń baǵasy alǵash ret 0 dollardan tómenge tústi. Osy jaǵdaıǵa baılanysty Qamshy tilshisi shetel basylymdaryna, ásirese, Reuters jáne Al Jazeera-nyń saraptamalarynyń pikirlerine sholý jasady. 

Munaı baǵasynda tarıhı qulaý oryn alǵannan keıin kóp uzamaı baǵa birshama qalpyna keldi. Alǵash ret Amerıka Qurama Shtattary munaıynyń baǵasy $ 0-dan tómenge tústi. Sońynan birtindep kóterile basady.

AQSH-tyń West Texas Intermediate (WTI) markaly munaı jetkizilimi aldyńǵy sesıada barreline 37,63 dollarǵa arzandaǵannan keıin, bir barel úshin $ 38,73 dollarǵa kóterildi.

WTI úshin mamyr aıyndaǵy kelisimshart seısenbide aıaqtaldy, al neǵurlym belsendi saýda jasaıtyn maýsymdyq kelisimshart boıynsha barreline $ 1,72 sent nemese 8,4% kóterilip, barel úshin $ 22,15 qurady.

AxiCorp-tiń Azıa-Tynyq muhıty naryqtaryndaǵy strategi Stıven Innes Al Jazeera-ǵa AQSH shıkizattyq fúchersteriniń teris baǵasy jaı ǵana tehnıkalyq saldar bolǵanyna qaramastan, "bul suranystyń buzylǵanyn bildiredi, óıtkeni eshkim munaıdy saqtaǵysy kelmeıdi" degen.

– Eger OPEK budan ári munaı óndirisin qysqartpasa, osylaı kete beretin bolsa, nesıelik, banktik rıskter, jumyssyzdyq rıski sıaqty kóptegen qıyndyqtarǵa ákelýi múmkin, – dedi Innes.

Jahandyq etalondyq Brent markaly munaı baǵasy maýsym aıynda jetkizilim úshin 49 sent nemese 1,9 paıyzǵa kóterilip, barreline $ 26,06 boldy.

– COVID-19 saldarynan týyndaǵan suranystyń azaıýy AQSH ekonomıkasynyń baıaý qaıta qalpyna kelýine ákep soqtyrady, – dedi OANDA brokeri, aǵa sarapshysy Edvard Moıa munaı baǵasynyń álsiz kezeńin boljap.

Onyń aıtýynsha, WTI munaıynyń maýsymdyq kelisim-sharty bir barel úshin 20 dollardy ustap turdy. Al, mamyrdaǵy kelisimshart boıynsha, osy jolǵy aýyr soqqydan keıin az ǵana paıda kóre bastaıdy.

– Týrızmge shekteýler men karantın sıaqty sharalar munaı baǵasyna keri áser etti. Bundaı koronavırýs shekteýleri jahandyq otyndy paıdalanýdy shekteıdi, suranysty álem boıynsha 30 paıyzǵa tómendetedi. Saldarynan shıkizat qorlarynyń ósýine ákelip soqty da, ony saqtaý oryndaryn tabý qıyndaı tústi, – dedi Edvard Moıa.

Al, AQSH-tyń Oklamaha shtaty, Kýshıngtegi basty munaı saqtaý orny birneshe aptada tolady dep kútilýde.

– Búgingi tańda naryqtaǵy negizgi másele – bul AQSH-taǵy usynystyń artýy jáne saqtaý syıymdylyǵynyń bolmaýy, – dedi Sıdneıdegi CMC Markets bas marketology Maıkl MakKartı.

Daǵdarysqa baılanysty Munaı eksporttaýshy elder uıymy (OPEK) jáne onyń odaqtastary Reseı, jalpy OPEK + dep atalatyn top elder óndirýdi kúnine 9,7 mıllıon barelge qysqartýǵa kelisti. Biraq bul kelisim mamyr aıynan keıin bastalady. Biraq olar kelisken munaı óndirisin qysqartý mólsheri naryqtaǵy tepe-teńdikti qalpyna keltirýge jetkilikti yqpal etpeýi múmkin deıdi sarapshylar.

Al Jazeera-ǵa suhbat bergen Innes "OPEK + óndiristi kóp mólsherde qysqartýdy qarastyrýy múmkin jáne AQSH jetkizilimniń tómendeýin qarastyrýǵa májbúr bolady, óıtkeni munaı baǵasyn durystaý úshin "barlyǵy birge jumys jasaýǵa tıis. Qaýip tym joǵary" dedi ol.

Bul qaýip tek qarjy naryǵynda shıki munaı satyp alatyn ınvestorlarǵa ǵana emes, sonymen birge munaı-gaz salasynda jumys isteıtin mıllıondaǵan adamdarǵa da baılanysty ekenin aıtty.

Reıter aqparattyq agenttiginiń bes sarapshysy júrgizgen saýalnamaǵa sáıkes, AQSH-taǵy shıkizat qorlary sáýirdiń 17-sine deıingi bir apta ishinde shamamen 16,1 mıllıon barelge ósken. Bul – tarıhtaǵy eń kóp mólsher. Sarapshylar ótken aptada benzın qory 3,7 mıllıon barelge ósti dep boljap otyr.