Aqtóbe qalasynyń turǵyny Janat Sarınova qaladaǵy aýrýhanalar "naýqastardy qabyldamaı jatyr" dep shaǵyndy. Ol 19 maýsym kúni kúndiz anasy  Gúlbaqyt Maımaqova kenetten syrqattanyp qalǵan soń jedel járdem shaqyrǵan. Biraq jedel járdem jetkizgen naýqasty aýrýhana qabyldamaı qoıypty. 

Janat Sarınovanyń aıtýynsha, jedel-járdem naýqastanǵan anasyn Aqtóbedegi Temir jol aýrýhanasyna (TJ) alyp barady. Alaıda aýrýhana tek rentgenge túsýge ruqsat bergen. Rentgen nátıjesine saı anasyna "ekijaqty pnevmonıa" degen dıagnoz qoıylǵan.  

Anasyna naqty dıagnoz qoıylsa da, emhana meńgerýshisi Aıman Muhaljarqyzy aýrýhanada shuǵyl túrde túsken aýrýlardy Aqtóbe medısına ortalyǵy (AMO) qabyldaıtynyn aıtqan. Meńgerýshi emhanada dáriger men oryn joqtyǵyn alǵa tartyp, naýqasty qabyldaýdan bas tartqan. Amaly taýsylǵan Janat anasyn ertip AMO-ǵa barady. Ol jerdegiler qaıtadan "Temir jol aýrýhanasyna baryńyz" depti. 

 

 

 

Posmotret etý pýblıkasıý v Instagram

 

 

Zdravstvýıte opýblıkýıte pojalýısta mame ploho ne prınımaıýt nıgde.

Pýblıkasıa ot Pýstgovorát /jıvý v storıs (@pga_alima) 19 Iýn 2020 v 7:55 PDT

– Men anamdy ertip eki birdeı aýrýhananyń arasynda júrdim. Temir jol aýrýhanasynyń 5-qabatyna deıin kóterildim. Bólmelerdiń báriniń bos emesin kórdim. Dárigerdiń orynbasary bir táýlikte 205 naýqastyń ekijaqty pnevmonıamen túskenin aıtty. Eki medbıke ǵana aýyr naýqastarǵa jasandy aýa berip kómektesip júrdi. Al sonda kezekshi dárigerler qaıda? Anam qant dıabetimen de aýyratyn. Ózin nashar sezinip, dem ala almaı jatqanyn kórgen soń ǵana medbıkeler jasandy tynys alý aparatymen kómektesti. Biraq jaǵdaıy nasharlap bara jatqan soń arbaǵa salyp alyp ketti. Sodan soń ǵana bir dáriger qarapty. Pnevmonıamen aýyrǵan adamdy ókpesi bir sátte-aq qysyp tastasa, ómirden ótip ketýi múmkin. Dárigerler nege joq? Onyń ústine, aýrýhanada jóndeý jumystary júrgizilip jatyr eken, – deıdi Janat. 

Onyń aıtýynsha, qazir anasynyń jaǵdaıy jaqsy, aýrýhana dálizinde em alyp jatyr.

19 maýsym kúni Azattyq Radıosyna suhbat bergen Aqtóbe oblystyq densaýlyq saqtaý basqarmasy basshysynyń mindetin atqarýshy Svetlana Esenamanova oblysta pnevmanıa juqtyrǵandar kúrt ósip, dárigerler jetpeı jatqanyn aıtqan.

"Jaǵdaı qıyndap ketkendikten Aqtóbedegi 3 stasıonar bazasynan pýlmonologıa bólimin jasaqtap, kereýet sanyn 446-ǵa deıin kóbeıtýge májbúr boldyq. Aqtóbede pnevmonıany emdeıtin dáriger jetispeı jatyr. Ótken túni 10 dárigerdiń jumysyn 4 adam atqardy. Úsh stasıonardaǵy qıyn ahýaldy kórip, jumys isteýden bas tartyp jatqan dárigerler de bar. Osyǵan oraı emhanalardaǵy josparly jumysty tolyǵymen toqtatyp, ondaǵy mamandardy pýlmonologıa bólimderine tartý týraly buıryq shyǵardym" dedi Esenamanova.

Oblystyq densaýlyq saqtaý basqarmasy málimetinshe, sońǵy úsh táýlikte Aqtóbe oblysynda jedel pnevmonıadan 8 adam qaza bolǵan. 22 adam hal ústinde jatyr. Pnevmonıa juqtyrǵandardyń arasynda medısına qyzmetkerleri de bar. Jaǵdaıy kúrt qıyndaǵan 16 naýqasty dárigerler jasandy tynys alý apparatyna qosýǵa májbúr bolǵan.

Densaýlyq saqtaý mınıstrligniń sońǵy málimetine saı, Aqtóbe oblysynda barlyǵy 853 adamnan koronavırýs tabylǵan. Olardyń 588-inde aýrý belgileri bar, al 265 adamnan COVID-19 belgisi baıqalmaǵan. 318 adam vırýstan aıyǵyp shyqty, bir adam qaıtys bolǵan. 

Daıyndaǵan: Qundyzaı Ámirbekqyzy