Álemde ashtyqtan zardap shekkenderdiń sany ósip jatyr. Bul týraly BUU Balalar qory (IýNISEF) jarıalaǵan baıandamada aıtylǵan.

2019 jyly álemde 690 mln adam ashtyqtan japa shekken. Bul bir jyl burynǵy kórsetkishten 10 mln, 5 jyl burynǵy kórsetkishten 60 mln adamǵa kóp.

Sondaı-aq 2019 jyly 2 mlrd adam tamaq jetispeýshiliginen zardap shekken.

Mamandar koronavırýs pandemıasy jaǵdaıdy ýshyqtyra túskenin aıtty. Olardyń sózinshe, pandemıa kesirinen paıda bolǵan jahandyq daǵdarys tek óndiriske ǵana emes, azyq-túlikti tutynýǵa da áser etken.

– Koronavırýs pandemıasynyń densaýlyq saqtaý, áleýmettik jáne ekonomıkalyq salalarǵa keri áseri kóp. Bul tutynýshylyq qaýipsizdikke jáne halyqtyń osal toptaryna qıynǵa soǵady, – deıdi BUU ókilderi.

Eger qazirgi úrdis jalǵasatyn bolsa, onda 2030 jyly álemde 840 mln adam ashtyqtan zardap shegýi múmkin. Bul jaǵdaıda ásirese balalar qatty zardap shegip jatyr.

Baıandama avtorlarynyń málimetinshe, 2019 jyly álemde 5 jasqa deıingi árbir besinshi balada (21%) durys tamaqtanbaý saldarynan damýynda aýytqý baıqalǵan.

BUU-nyń baǵalaýy boıynsha, ashtyqtan zardap shegetin adamdardyń kópshiligi – 381 mln adam Azıada turady. Afrıkada 250 mln adam, Latyn Amerıkasynda jáne Karıb aımaǵynda 48 mln adam qıyn jaǵdaıda.