Qazaqstanda koronavırýs pen pnevmonıa órshigen tusta elde eriktiler toby kóbeıip, jurt bir-birine kómektese bastady. Qazaqstannyń batysyndaǵy Aqtóbede de ahýal kúrdeli. Aımaqtyń eki myńǵa jýyq turǵyny COVID-19 ınfeksıasyn juqtyryp, úsh myńdaı adam pnevmonıaǵa shaldyqqan. Osydan keıin Aqtóbedegi birneshe qozǵalys kúsh biriktirip, “AntiCovid-19” dep atalatyn eriktiler birlestigin qurdy. Azattyq osy toptyń múshelerimen tildesti.

“BİZ SYILAǴAN APPARAT BİR ADAMDY AJALDAN QUTQARSA, KÚLLİ ÁLEM İNDETTEN ARYLǴANDAI QÝANAMYZ”

Ekaterına Golotına, 33 jasta, meıramhana, qonaq úı salasynyń mamany. “AntiCovid-19” eriktiler birlestiginiń jetekshisi:

;lgbjlrkejhdgsf

Naýryzda Aqtóbede koronavırýs juqtyrǵandar anyqtala bastady. Sol kezde “eriktiler birigýi kerek” dep sheshtik. Joǵalǵan adamdardy izdeıtin, aýyr naýqastardyń otasyna qarjy jınaıtyn jáne taǵy basqa eriktiler toby birigip “AntiCovid-19” dep atalǵan birlestik qurdyq. “AntiCovid-19” birinshi karantın kezinde (16 naýryz – 11 mamyr) tabysynan aıyrylyp, muqtajdyq kórgen eki myń otbasyna qoldaý kórsetti. Azyq-túlik jetkizdi, páter aqysyn tóleı almaı otyrǵan muqtaj adamdarǵa qarjy bóldi. Ońtústiktegi Maqtaaraldy sý basqanda gýmanıtarlyq kómek jiberdi.

Maýsym aıynda dárigerlerdi qoldaýǵa kiristik. Qazir Aqtóbeniń aýrýhanalarynda ottegi toltyratyn qapshyqtar men konsentratorlar jetispeıdi. Sondyqtan qala turǵyndarynan qarjy jınap, ony únemdep jumsaýǵa tyrysamyz. “AntiCovid-19” birlestiginiń bir múshesine ınternetten konsentrator óndirýshilerdi izdep, ónim baǵasyn salystyrý júktelgen. Osy kezge deıin 6 konsentratorǵa tapsyrys berdik. Árqaısy 400 myń teńge turady. Odan bólek aýrýhanalarǵa 20-dan astam ottegi qapshyǵyn satyp áperdik. Dárigerler “Sizder syılaǵan apparat bir adamdy ajaldan arashalap qaldy” dep habarlasqanda kúlli álem indetten arylǵandaı qýanamyz.

Bir aptadan beri meniń de murnym ıis sezýden qaldy. Denemniń qyzýy da túspeı tur. Sondyqtan eriktiler tobynan oqshaýlanyp, úıde jumys istep otyrmyn. Syn saǵatta kómektiń kez kelgen túri mańyzdy.

Aqtóbede erikti bolǵysy keletinder kóp. “Jalaqysy qansha? Kóligime benzın quıasyzdar ma?” dep habarlasatyndar da bar. Naǵyz volonter etken eńbegi úshin eshkimnen aqy da, maqtan da kútpeıdi. Qazir “AntiCovid-19” birlestiginiń 70-ke jýyq belsendi múshesi bar.

“MEDISINALYQ BİLİMİMİZ JOQ. ESESİNE DÁRİGERLERGE KÓMEKTESİP, BEINETİN JEŃİLDETE ALAMYZ”

Baqytqalı Orazǵalıev, 34 jasta, jeke kásipker, erikti

Álemdi indet jaılaǵanǵa deıin bizdiń tobymyz iz-tússiz joǵalǵan adamdardy izdeıtin. Tótenshe jaǵdaılar departamenti, polısıamen memorandým jasap, daıyndyq kýrstarynan ótip júrdik. Naýryzda Aqtóbe eriktileri kúsh biriktirip, koronavırýspen kúrese bastady.

Mysaly, búgin (9 shilde) eriktilerdiń bir toby ınfeksıalyq aýrýhanaǵa ottegi balondaryn túsirip berdik. Kún saıyn árqaısy 70-80 kelilik balondardy júk kóliginen túsirip, “qyzyl zonaǵa” deıin jetkizip beremiz. Árıne, kómek qajet bolsa, ol jaqqa barýdan da bas tartpas edik. Biraq eriktilerdi “qyzyl zonaǵa” ótkizbeıdi. Bizdiń medısınalyq bilimimiz joq. Esesine dárigerlerge kómektesip, beınetterin jeńildete alamyz. Olar “ottegi taýsylyp qaldy”, “as ázirleýim kerek” dep alańdamaýy tıis.

Aýrýhanalarda er adamdar az. Tehnıkalyq personaldyń basym kópshiligi qyz-kelinshekter. Taldyrmash qyzǵa 70-80 kelilik ottegi balondaryn tasý ońaı emes. İndetpen kúresýshi medısına mekemeleriniń bárine qol kómegi kerek. Olarǵa qol ushyn berý eriktilerge zor mártebe. Men buryn mundaı sezimderdi iz-tússiz joǵalǵan jasóspirimderdi taýyp alǵan kezde basymnan ótkeretinmin. Eriktilerdiń bári – áltrýıst. Al áltrýıster ózgege baqyt syılaıtyn, ózderi de óte baqytty adamdar.