Qaraǵandy oblysy Sátbaev qalasynda 5 jasar qyz balany urlaǵan kúdikti ustaldy. Bul týraly polisia.kz saıty habaralady. 

Saıt taratqan aqparatqa qaraǵanda oqıǵa keshe bolǵan. 

"23 shilde kúni saǵat 21.00-de Sátbaev qalasynyń polısıasyna Jezqazǵan turǵyny óziniń 5 jasar qyzy joǵalyp ketkeni týraly habarlaǵan. Sátbaev qalalyq polısıa bóliminiń barlyq quramy men volonterler qatysqan izdeý sharalarynyń nátıjesinde 5 jasar bala kópqabatty úıdegi páterlerdiń birinen tabyldy. Búldirshin qazir aýrýhanada jatyr. Kúdikti ustaldy. Biraq bir top adam kúdiktini ózderine berýdi talap etýde. Tártipsizdikke jol bermeý úshin quqyq qorǵaý kúshteri jumyldyryldy. Qaraǵandy oblysynyń polısıa departamenti qoǵamdyq tártipti jáne qala turǵyndarynyń qaýipsizdigin qamtamasyz etý úshin barlyq qajetti sharalardy qabyldap jatyr" delingen resmı habarlamada.

Qala turǵyndary kúdiktini ózderine berýdi surap, shý kótergeni áleýmettik jelide taraǵan vıdeolarda da baıqaldy.