1 mln 661 myń qazaqstandyqqa 42 500 teńge birjolǵy tólemi berildi, dep habarlady eńbek jáne halyqty áleýmettik qorǵaý mınıstrliginiń baspasóz qyzmeti.

"24 shilde saǵat 9.00-degi jaǵdaı boıynsha shilde aıynda shekteý sharalaryn engizýge baılanysty tabysynan aıyrylǵan jaǵdaıda Memlekettik áleýmettik saqtandyrý qorynan eń tómengi jalaqy – 42 500 teńge mólsherinde birjolǵy tólem taǵaıyndaýǵa azamattardan 2 mln-nan astam biregeı ótinish qabyldandy. Tólem 1 mln 661 myń adamǵa taǵaıyndaldy. Aqshalaı qarajat 1 mln 594 myń qazaqstandyqqa aýdaryldy" delingen habarlamada.

MÁSQ-tan tólem alýǵa ótinimder birneshe arna arqyly qabyldanady. 2 mıllıonnan astam ótinimniń ishinde:

– 801,8 myń adam proaktıvti formatta tólem taǵaıyndaýǵa kelisim berdi;

– 499,4 myń adam Egov.kz portaly jáne Telegram-bottar arqyly;

– 226 myń adam 42500.enbek.kz portaly arqyly;

– 494,3 myń adam ekinshi deńgeıdegi bankterdiń mobıldi qosymshasy men ınternet resýrstary arqyly ótinish bergen.

Azamattardyń sanattary bólinisinde:

– 801,8 myń ótinish biryńǵaı jıyntyq tólem tóleýshilerden berildi (proaktıvti formatta);

– 137,7 myń ótinishti jaldamaly qyzmetkeri úshin jumys berýshiler berdi;

– 1 mln 82 myń ótinish azamattardyń basqa sanattarynan kelip tústi (jeke kásipkerler; jeke praktıkamen aınalysatyn adamdar; azamattyq-quqyqtyq sıpattaǵy sharttar boıynsha tabys alatyn jeke tulǵalar).