Sátpaev qalasynda urlanǵan 5 jasar qyzdyń ata-anasy áleýmettik jelide Jezqazǵan men Sátpaev qalalarynyń turǵyndaryna úndeý jasady. 

– Birinshi kezekte biz – Súleımen otbasy, atap aıtqanda ata-anasy Óteýbaı-Manara óz atymyzdan qalanyń jurtshylyǵy men eriktilerge qyzymyzdy izdestirýge atsalysyp, úles qosqandary úshin alǵys bildiremiz! Aısezimniń tabylýyna sizderdiń septikterińiz tıdi. Aısezimge jáne onyń otbasyna bildirip jatqan jyly lebizderińiz ben qoldaýlaryńyzǵa raqmet aıtamyz. Qazirgi kúni qyzymyzdyń jaǵdaıy mamandar tarapynan jaqsy dep baǵalanýda. Bizben psıhologtar men arnaıy dárigerler kúndelikti baılanysta otyr. Sondaı-aq biz QR bala quqyǵy jónindegi ýákil Arýjan Saınmen de tyǵyz baılanystamyz. Ol óz tarapynan qajetti mamandar men reabılıtasıalyq emhanalardy tabýǵa, sondaı-aq advokat pen quqyqtyq qorǵaýdy uıymdastyrýǵa kómegin tıgizip jatyr, – dep jazylǵan úndeýde.

Qyzdyń ata-anasynyń aıtýynsha, otbasynyń qarjylaı kómekke muqtajdyǵy joq, barlyq psıhologıalyq jáne qarjylaı shyǵyndy "Qazaqmys" óteýge ýáde bergen.

– Erekshe alǵysymyzdy "Qazaqmys Korporasıasy" JSHS-ine bildiremiz. Kompanıa basshylyǵy Aısezimdi reabılıtasıadan ótkizýge jumsalatyn shyǵyndardyń bárin óteýge sheshim qabyldady. Sondyqtan qarjylaı kómekke muqtajdyǵymyz joq, – deıdi olar.

Sondaı-aq olar, jalǵan aqparat taratpaýdy surady.

– Taǵy bir aıtarymyz: qyzymyzdyń sýretin áleýmettik jeliler men messendjerlerde taratýdy, oqıǵaǵa qatysty túrli pikirler men jalǵan aqparattardy taratýdy doǵarýlaryńyzdy suraımyz. Biz bolǵan oqıǵany tezirek umytqymyz keledi. Úlken ótinish: qarjylaı qor uıymdastyrýdy, túrli jıyn ótkizýdi toqtatyńyzdarshy! Bizdiń basymyzǵa túsken qaıǵy basqa keleńsiz oqıǵalardyń sebebi bolýyn qalamaımyz. Munyń bári bizdiń otbasy úshin aýyr soqqy ári sol qaıǵyly kúndi oıymyzǵa sala beredi, – dedi Aısezimniń ata-anasy.