Sátbaevta 5 jasar qyz balany urlady jáne zorlady degen aıyp taǵylǵan kúdiktini eki aıǵa qamaý úshin sanksıa taǵaıyndady, – dep habarlady oblystyq sot.

Qamaý merzimi kúdikti ustalǵan 23 shildeden bastap esepteledi. 

Sot otyrysy karantınge baılanysty beınebaılanys arqyly ótti. Kúdiktiniń advokaty 62 jastaǵy er adamdy qamaýǵa almaýdy surady. Qorǵaýshy kúdiktiniń birqatar syrqatynyń bar ekenin alǵa tartty. Sondaı-aq advokat turǵyndar tarapynan qaýiptiń bolatynyn eskerýdi surap, ony bostandyqqa shyǵarsa kúzet qajet ekenin aıtty. Degenmen sýdıa kúdiktini qamaýǵa alý jóninde sheshim shyǵardy. 

23 shildede Satbaevta úı aýlasynda oınap júrgen 5 jasar qyz bala joǵalyp, kópqabatty turǵyn úıdegi páterlerdiń birinen tabylǵan bolatyn. Balany urlaǵan kúdiktini turǵyndar zańmen emes, óz qoldarymen jazalamaq bolyp, polısıadan ony berýdi talap etti. Polısıaǵa jappaı tártipsizdikke ulasýdyń aldyn alý úshin tarqamaı turǵan narazy topty sabyrǵa shaqyrýǵa, qaýipsizdik sharalaryn qabyldaýǵa týra keldi.