Qurmetti dostar! Barshańyzdy elimizde alǵash ret resmı túrde atalyp ótip jatqan Abaı kúnimen quttyqtaımyn!⁣⁣⠀
⁣⁣⠀
Bul – qazaq úshin tarıhı oqıǵa, zor qýanysh jáne ulttyq qundylyqtardy ulyqtaýdyń jańa belesi, eldik pen egemendiktiń jarqyn kórinisi.⁣⁣⠀
⁣⁣⠀
Uly oıshyldyń 175 jyldyǵynda osyndaı derbes kúnniń belgilenýi óte oryndy bastama. Óıtkeni sanamyzdy jańǵyrtyp, sapamyzdy arttyrýda Abaı eńbekteriniń alar orny erekshe. Sondyqtan bul sheshimdi bas aqynǵa ǵana emes, qazaq ádebıeti men mádenıetine, bilimi men ǵylymyna, tutas ult rýhanıatyna kórsetilgen zor qurmet dep qabyldaımyz.⁣⁣

Abaı murasy otanshyl, adal, parasatty, bilimdi, bilikti urpaq tárbıeleýdiń negizi dep aıtsaq ta artyq bolmaıdy. Sol sebepti, uly aqynnyń shyǵarmalaryn qazirgi zamannyń talaptary men tetikterin eskere otyryp, keńinen nasıhattaǵan jón. Osyǵan oraı Prezıdentimiz Qasym-Jomart Kemeluly Toqaev óziniń "Abaı jáne HHİ ǵasyrdaǵy Qazaqstan" atty maqalasynda kóptegen ózekti máselelerdi kóterip, utymdy oılaryn ortaǵa salǵanyn jaqsy bilemiz.⁣⁣

Memleket basshysy búgin "Egemen Qazaqstan" gazetine jarıalanǵan "Abaı – rýhanı reformator" atty maqalasynda da uly oıshyldyń ilimi qazirgi birqatar baǵyttarǵa oraılas keletinine nazar aýdaryp, eldi bilim ıgerýde, tárbıe máselesinde, jańa kásip úırenýde jáne yntymaq-birlikte Abaıǵa júginýge shaqyrady. Shyn máninde, ult ustazynyń ulaǵaty – eshqashan mańyzyn da, qundylyǵyn da joǵaltpaıtyn ónege, óshpes ósıet.⁣⁣⠀
⁣⁣⠀
Eń bastysy, aqynnyń eńbekterin dáriptegende naýqanshylyqqa jol bermegen abzal. Prezıdentimiz aıtqandaı, ǵulamanyń mereıtoıy toı toılaý úshin emes, oı-órisimizdi keńeıtip, rýhanı damýymyz úshin qajet. Osy turǵydan kelgende búgingi merekeniń mán-mańyzy aıryqsha, kótergen júgi aýyr ekenin uǵamyz.⁣⁣

Endeshe ultymyzdyń órkenıet órine jasaǵan kezekti qadamy uzaǵynan bolǵaı! Uly oıshyldyń shyǵarmalary halqyna rýhanı qyzmetin jalǵastyra bersin! Abaı kúni qutty da qaıyrly bolsyn! Qazaq eli máńgi jasasyn!

Máýlen Áshimbaev,

QR Senatynyń tóraǵasy