Nurlan Nyǵmatýlın Májilistiń azamattyq qoǵam men syndarly usynystar úshin árdaıym ashyq ekenin aıtyp, sarapshylar qaýymdastyǵy ókilderiniń zań jobalarymen jumys isteýdegi tájirıbesine toqtaldy.
Bular eń aldymen, áleýmettik, ekonomıkalyq salalardy jetildirýge jáne Memleket Basshysynyń saıası reformalaryn iske asyrýǵa arnalǵan zańdar.
Májilis Tóraǵasynyń aıtýynsha, sarapshylardyń usynystary men pikirleri elimizdi damytýǵa jáne halyqtyń ál-aýqatyn arttyrýǵa baǵyttalǵan sapaly zańdardy daıyndaý úshin mańyzdy. 
- Bizdiń ustanymymyz barlyǵyna belgili – ol árdaıym zań shyǵarýshylyq jumys barysynda sarapshylar tarapynan aıtylǵan usynystar men pikirlerdi barynsha esepke alý. Biz zań jobalarymen jumys isteý kezinde sizderdiń baǵalaryńyz ben tujyrymdaryńyzǵa súıený úshin sarapshylar qaýymdastyǵymen únemi baılanysta bolýǵa nıettimiz, – dedi Nurlan Nyǵmatýlın. 
Sondaı-aq, Májilis Tóraǵasy depýtattardyń zań shyǵarý jumysy kezekti parlamenttik sesıalar arasyndaǵy kezeńde de jalǵasatynyna nazar aýdardy. Nurlan Nyǵmatýlın atap ótkendeı, qazir Májilistiń zańnamalyq qorjynynda 72 zań jobasy bar bolsa, onyń 21-ne depýtattardyń ózderi bastamashy bolǵan.
Májilis Spıkeri aldaǵy sesıada depýtattardyń zań shyǵarý qyzmetiniń basym baǵyttary týraly aıta kelip, Memleket Basshysy Qasym-Jomart Toqaevtyń parlamenttik sesıanyń ashylýynda josparlanyp otyrǵan halyqqa Joldaýynyń oryndalýyn zańnamalyq qoldaýdy qamtamasyz etýdiń mańyzdylyǵyn atap ótti. 
Aldaǵy ýaqytta depýtattarǵa aýyldyq, aýdandyq, qalalyq deńgeıdegi bılikpen jaýapkershilikti keńeıtý máseleleri boıynsha Ekologıalyq kodeks jobasymen de jumys isteý mindeti tur. 
Óz kezeginde kezdesýge qatysýshylar «Jaıylymdar týraly» Zańdy tıimdi qoldaný, jeke tulǵalardyń bankrottyǵy jáne halyqtyń nesıelendirilýi men qoǵamdyq keńesterdiń jumysy sıaqty birqatar máselelerdi kóterdi. 
Otyrys barysynda sybaılas jemqorlyqqa qarsy zańnamany kúsheıtý jónindegi jumysta depýtattyq korpýs pen sarapshylar qoǵamdastyǵynyń yntymaqtastyǵyna erekshe nazar aýdaryldy.
Nurlan Nyǵmatýlın depýtattyq korpýs pen sarapshylar qaýymdastyǵynyń yntymaqtastyǵynyń nátıjesinde aýqymdy pikirlerdi eskere otyryp, sapaly zań jobalaryn qabyldaýǵa bolatynyna senim bildirdi.
(Májilistiń Baspasóz qyzmeti, 74-63-01, sýretti túsirgen J.Quspanov). 
