Qazaqstan Respýblıkasynyń Memlekettik hatshysy Qyrymbek Kósherbaev bastaǵan delegasıa Semeı polıgonynyń jabylý kúnine oraı Shyǵys Qazaqstan oblysynda bolyp, Semeı qalasyndaǵy ıadrolyq synaqtyń qurbandaryna arnalǵan Monýmentke gúl shoqtaryn qoıdy.

Delegasıa quramynda Mádenıet jáne sport mınıstri Aqtoty Raıymqulova, Jazýshylar odaǵynyń tóraǵasy Ulyqbek Esdáýlet jáne basqa da azamattar bar.

Iadrolyq synaqtyń qurbandaryna arnalǵan Monýmentke gúl shoqtaryn qoıý rásiminde Memlekettik hatshy jarty ǵasyrdan astam ýaqyt ótkizilip kelgen ıadrolyq jarylystardy tolyqqandy toqtatyp, polıgondy jabý burynǵy Keńester odaǵy basshylyǵynyń qarsylyǵyna qaramastan Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń patrıottyq, ultjandy tarıhı sheshimi semeılikterdiń ǵana emes, búkil qazaq halqynyń, qazaqstandyqtardyń, dúnıejúzindegi progresıvti adamzattyń qoldaýyna ıe bolǵanyn atap ótti.

Memlekettik hatshy Prezıdent Qasym-Jomart Toqaevtyń Semeı ıadrolyq synaq polıgonynyń jabylýynyń ataýly kúnine oraı qazaqstandyqtarǵa arnaǵan Úndeýin oqyp berdi.

Odan ári Memlekettik hatshy bastaǵan delegasıa jáne Abaı Qunanbaıulynyń 175 jyldyǵyn daıyndaý jáne ótkizý jónindegi memlekettik komısıanyń bir top músheleri Semeı qalasyndaǵy Abaı eskertkishine gúl shoqtaryn qoıyp, «Qaraǵaıly» shaǵyn aýdanynyń, kópbeıindi mádenı-sporttyq kesheniniń qurylys barysymen, Abaı atyndaǵy alańdy, Abaı atyndaǵy teatrdy qaıta qalypyna keltirý, Abaı atyndaǵy mýzeıdi qaıta jańǵyrtý jumystarymen tanysty. Budan keıin Abaı aýdanynda bolyp, el Prezıdenti Q.K.Toqaevtyń Abaı Qunanbaıulynyń 175 jyldyǵyna oraı bergen tapsyrmasyna sáıkes qalypqa keltirilgen Syrt-Qasqabulaqtaǵy, Jıdebaıdaǵy tarıhı nysandardy aralap kórdi.