Búgin Praımerız ótkizý jónindegi Ortalyq uıymdastyrý komıtetiniń otyrysynda «Nur Otan» partıasyna jańa músheler qabyldaýdy bıylǵy 11 qyrkúıekten 4 qazanǵa deıingi aralyqta, ıaǵnı daýys berý aıaqtalǵanǵa deıin toqtata turý týraly sheshim qabyldandy.
Sońǵy kezde bizge jekelegen azamattardan «óz» kandıdattaryna daýys bergizý maqsatynda partıaǵa májbúrlep kirgizý týraly «aryzdar» túsýde. Buǵan múldem jol berýge bolmaıdy dep esepteımin. Mundaı árbir faktini túrli deńgeıdegi partıalyq baqylaý komısıasy jan-jaqty qaraıtyn bolady.
Jarǵymyzǵa sáıkes partıaǵa múshe bolý elimizdiń árbir azamatynyń erikti jáne ózindik tańdaýy bolyp tabylatynyn taǵy da atap ótkim keledi. Sonymen, 1 tamyzdan beri «Nur Otan»-ǵa 25 myńdaı jańa belsendi azamat múshelikke ótti. Sońǵy jyldary «partıalastar qataryn tazartý» aıasynda «Nur Otan»-nan 256 myń adam shyǵarylǵan bolatyn. Búginde partıamyz qatarynda barlyǵy 835 myń qazaqstandyq bar.
Ózderińizge málim, praımerızde onlaın-daýys berýdiń aıqyndyǵyn qamtamasyz etý úshin biz arnaıy rastaý (verıfıkasıa) júıesin paıdalanyp otyrmyz (tulǵany ınternet-bankıng úlgisi boıynsha anyqtaý). Júıeniń prınsıpi: «Bir daýys, bir JSN, bir mobıldi nómir jáne bir IP-adres». Eger osy derekterdiń biri sáıkes kelmese, onda adam «praımerız» aqparattyq júıesine tirkele almaıdy, ıaǵnı daýys bere almaıdy. Munyń barlyǵy túrli aıla-sharǵyǵa, burmalaýshylyqtarǵa, sondaı-aq yqtımal jappaı daýys berýge jol bermeý maqsatynda istelip otyr.
Qurmetti dostar! Barlyq tártip buzý faktileri boıynsha bizdiń 8 (800) 080 4441 (qońyraý soǵý tegin) jedel jelisine ne komek@nurotan.kz elektrondy pochtasy arqyly habarlasa alasyzdar.
Partıalyqtardyń, jurtshylyqtyń qoldaýymen biz Elbasy, «Nur Otan» partıasynyń Lıderi Nursultan Nazarbaev aıtqandaı, praımerızdi ashyq, ádil jáne barshaǵa teń jaǵdaıda ótkizetinimizge senimdimin.
Pikir qaldyrý