«Nur Otan» partıaishilik irikteý sheńberindegi onlaın-daýys berýdiń birinshi kúniniń aralyq nátıjelerin jarıalady. Qazirgi sátte Primaries aqparattyq júıesi arqyly 300 myńnan astam partıa múshesi úmitkerlerge daýys berdi.
Bul rette, saılaýshylar tórt tásilmen: arnaıy mobıldi qosymsha arqyly, primaries.kz saıty arqyly, saıtta onlaın daýys berý arqyly nemese ınternetke kirý múmkindigi joq ýchaskelerde dástúrli qaǵaz búletendi paıdalaný arqyly daýys bere alady.
Al saılaý ýchaskelerinde daýys berý saılaýshylar úshin 3 qazan kúni saǵat 08:00-de bastalyp, 14:00-ge deıin sozylady. Praımerız ótkizý erejesinde ár úmitker tarapynan táýelsiz baqylaýshylardyń qatysýy qarastyrylǵan, olardyń mindetteri men ókilettikterin anyqtaıtyn ereje bekitilgen.
Partıa baspasóz qyzmeti taratqan aqparatqa sáıkes, «Nur Otan» praımerızine 10 myńnan astam kandıdat qatysýda. Elimizde bir orynǵa ortasha alǵanda tórt adam úmitker bolyp otyr. Kandıdattardyń 70%-y – ózin-ózi usynǵandar, myńǵa jýyǵy – partıanyń jańa músheleri. 37% - áıelder, 29% – 35 jasqa deıingi jastar. Qatysýshylardyń ortasha jasy – 43 jas.
Praımerızge qatysýshylar bir aı ishinde 1,3 mıllıonnan astam adamdy qamtyǵan 57 myńnan astam úgit-nasıhat sharalaryn ótkizdi.
Praımerız nátıjeleri kandıdattardyń reıtıńteri kórsetile otyryp, 5 qazanda jarıalanbaq.
Pikir qaldyrý