Dúnıejúzilik banktiń jyl saıyn júrgizetin Memlekettik basqarý ındıkatorlary (Worldwide Government Indicators) boıynsha zertteýinde Qazaqstannyń kórsetkishi jaqsardy.

WGI – Dúnıejúzilik bank tobynyń álem elderiniń memlekettik basqarý sapasy men tıimdiligi salasyndaǵy jetistikterin baǵalaıtyn keshendi zertteýi. Zertteý ádistemesinde memlekettik basqarý sapasynyń barlyq basty parametrin keshendi túrde kórsetetin negizgi alty ındıkator qoldanylady.

Jańartylǵan esepte Qazaqstan 6 kórsetkishiniń beseýin jaqsartqan:

1. Úkimet jumysynyń tıimdiligi;
2. Regýlátorlyq klımat sapasy;
3. Saıası turaqtylyq;
4. Zańnyń ústemdigi;
5. Jemqorlyqpen kúres.

Dúnıejúzilik bank bılik ınstıtýtyn nyǵaıtý, onyń tıimdiligin, ashyqtyǵy men boljamdylyǵyn arttyrý boıynsha Úkimettiń birizdi jumysyn joǵary baǵalap otyr.

Zertteýge sáıkes, Úkimettiń jumysynyń tıimdiligi memlekettik apparat jumysynyń sapasy jáne saıası, ekonomıkalyq baǵdaryndaǵy turaqtylyǵy, sonymen qatar halyqqa bazalyq memlekettik qyzmetterdi kórsetý kezinde (kólik, ınfraqurylym) qanaǵattanýshylyq deńgeıiniń esebinen kórsetkishi jaqsarǵan.

Regýlátorlyq klımat sapasy boıynsha Qazaqstan birneshe jyl boıy qalǵan bes kórsetkishten qaraǵanda jaqsyraq nátıjege qol jetkizip keledi. 2019 jyly Qazaqstan bıznes júrgizetin sheteldik ınvestorlardyń táýekelderin azaıtý boıynsha tıimdi sharalarynyń arqasynda óz pozısıasyn jaqsartqan edi.

Bank sonymen qatar bıliktiń sabaqtastyǵy jolǵa qoıylyp, ishki jáne syrtqy qaqtyǵystar bolmaǵandyqtan eldegi saıası turaqtylyq kórsetkishiniń jaqsarǵanyn atap ótedi.

Zańnyń ústemdigi kórsetkishi boıynsha daýdy retteýdiń balamaly júıesin damytý, quqyqtyń qorǵalýyn qamtamasyz etý jáne azamattyq, qylmystyq zańnamanyń jetildirilýi esebinen progres bary baıqalǵan.

Jemqorlyqpen kúres ındıkatory bıznes júrgizýde jemqorlyq qaýpiniń tómendeýi esebinen jaqsarǵan.

Jalpy WGI esebin ulttyq ekonomıkalar boljamy men nesıe baǵalaýyn qalyptastyrý úshin jetekshi halyqaralyq qarjy uıymdary, damý ınstıtýttary men reıtıń agenttikteri paıdalanady.

Sonymen qatar, Fitch reıtıń agenttiginiń zertteýi de ulttyq ekonomıkany «VVV» deńgeıinde bekemdep, Úkimet jumysynyń tıimdiligin atap ótken.