Erkebulan Daıyrov, M.Áýezov atyndaǵy Qazaqtyń Memlekettik akademıalyq drama teatrynyń akteri, «Serper» jastar syılyǵynyń laýreaty:
- Táýelsiz el bolyp, kórpemizdi qymtap, aıaǵymyzdan tik turǵannan beri teatrda, ádebıette, ǵylymda t.b salalarda bolsyn eńbek etip júrgen aǵa-azamattarymyzǵa osyndaı syılyq taǵaıyndaýy bolashaqta óner úshin qyzmet etýge bir talpynys beretini haq.
Qazaqta: «Bulaq kórseń kóziń ash»-degen ádemi sóz bar. Jastardy qoldap «Serper» syılyǵymen marapattap jatqany biz úshin úlken qýanysh.
Grýppalasym ári áriptesim Almastyń «Serper» syılyǵyn alǵany úshin óte qatty qýanyshtymyn. Bizdiń teatrdaǵy árbir akter bir-bir ataqqa laıyqty dep bilemin. Basshylyq, qyzmettes, úzengiles áriptes tarapynan osyndaı qoldaý tabylyp, ataq alyp jatqanymyz kishigirim alǵan beles dep oılaımyn. Búgingi qýanyshty kúnge jetpeı turyp bizde akademıada oqyp, ustazdyń aldynan ótip, Qazaqstannyń halyq artısi Esmuhan aǵa Obaevtyń sheberhanasynan shyńdaldyq. Meniń oıymsha janynda júrgen adamdardyń bári búgingi jetistigime sebepker, tipti ol adam tarapynan seni qoldaý tabylmaı jatsa da. Seni moıyndamaǵanynnyń ózi alǵa umtylýyna sebepker bolady. Bul tek basy ǵana dep oılaımyn. Qoldan kelgenshe ózine unaıtyn jumyspen aınalysyp, sodan lázzat ala bilý kerek. Al ataq ta, dańq ta aqyryn óz retimen keletin sekildi. «Maqsatsyz adam qanatsyz quspen teń»- dep jatamyz, meniń alǵan qoıǵan maqsattarym kóp. Qazaqstanda kıno óneri kúnnen kúnge damyp jatyr, bolashaqta sol kınodan oıyp turyp oryn alsam deımin. Kınoǵa túsip, kıno arqyly tanyla otyryp, teatrǵa kórermen jınap, teatrdyń statýsyn kóterý meniń negizgi maqsatym.
Almas Shaıahmetov, M.Áýezov atyndaǵy Qazaqtyń Memlekettik akademıalyq drama teatrynyń akteri, «Serper» jastar syılyǵynyń laýreaty:
- Qara shańyraq teatrǵa kelgeli alty jyldyń júzi bolypty. Sol jyldarda etken eńbegimiz baǵalanyp «Serper» jastar syılyǵynyń laýreaty atanyp otyrmyz. Bul biz úshin úlken qýanysh.
2013 jyl men úshin tabysty jyl boldy. Sebebi «Teatr kóktemi-2013» festıvalinde «jyldyń úzdik akteri» atalymymen marapattalsam, búgin laýreat atanyp otyrmyn. Bul bizdiń jetistigimizdiń bastamasy ǵana, áli de alar asýlarymyz alda. Akter únemi izdenis ústinde júretin adam. Búgingi «Serper» syılyǵyn ıelengenimiz, bizden eki ese jaýapkershilikti, eki ese eńbekti, eki ese izdenisti talap eteri sózsiz.
Esmuhan Obaev, Qazaqstannyń halyq artısi:
- Jas akterlerdiń professıonaldy teatrǵa kelgennen keıin, olardyń shyǵarmashylyǵynyń baǵalanǵany, halyqqa jetkeni, halyqtyń moıyndaǵany ol artıs úshin baqyttyń úlkeni bolý kerek. Onyń ishinde ustazy men úshin bul úlken qýanysh. Qarap otyrsam osy M.Áýezov teatrynda jetpisten asa akter bolsa, solardyń kóbisinin ustazy ekenmin. Ómirimniń jıyrma bes jylyn akter tárbıeleýmen ótkizip kele jatqan adammyn. Qazaqstannyń qaı teatrynda bolmasyn shákirtterim qyzmet etip jatyr. Basym kópshiligi Almatyda, onyń ishinde kópshiligi M.Áýezov teatrynda.
Erkebulan Daıyrov pen Almas Shaıahmetov «Serper» syılyǵynyń laýreaty atanyp otyr. Bul jas akterdiń eńbeginiń baǵalanǵany. Ekeýi de birinshi kýrstan bastap, sol kýrstyń ishinde lıderi boldy. Meniń bir sózim bar «jaqsy adamnan ǵana jaqsy artıs shyǵady» degen. Sondyqtan ekeýi de jaqsy adam, jumys isteý tásili de ózge artıserge qaraǵanda basqasha. Olardyń ereksheligi aýylda ósken, qazaqtyń tilin, ádebıetin, tarıhyn jaqsy biledi. Sonymen qatar tárbıesi ata kórgen, ana kórgen, úlkendi syılaıtyn, qazaqshylyǵy mol, ınabatty jigitter.
Ekeýinde qara shańyraq teatrdyń bas geroılary dep aıtýǵa bolady. Mysal úshin Erkebulan Daıyrov artıser armandap júretin M.Áýezovtiń «Eńlik-Kebegindegi» Kebek, «Abaıyndaǵy» Aıdar, D.Isabekovtyń «Jaýjúregindegi» Balýan Sholaq, N.Gogoldiń «Úılenýindegi» Podkolesın, Ý.Shekspırdiń «Romeo men Djýlettasyndaǵy» Merkýsıo, R.Otarbaevtyń «Beıbarys Sultanyndaǵy» Qalaýyn rolderin oınasa, Almas Shaıahmetov M.Áýezovtiń «Abaıyndaǵy» Aıdar, N.Orazalınniń «Shyraq janǵan túninde» Tańat, D.Isabekovtyń «Jaýjúregindegi» Sútemgen, R.Otarbaevtyń «Beıbarys Sultanyndaǵy» Qutyz, Ý.Shekspırdiń «Gamletinde» Laert obrazdaryn beıneledi.
Eki akterdi de segiz qyrly, bir syrly artıs dep aıtýǵa bolady. Ekeýiniń tili, faktýrasy, boıynyń bıiktigi, symbaty, sahnalyq bolmysy tartymdy. Jastardyń ishinde sýyrylyp alǵa shyqqannan keıin ekeýine qoıylatyn talapta kóp. Teatrdan bólek kıno ónerinde de úlken rolderge baryp júrgen akterler. Mysaly úshin Erkebulan Daıyrov jıyrma jeti jasynda halyq qaharmany Baýyrjannyń beınesin jasady. Akter úshin bul úlken jetistik. Búgingi jetken jetistikterimen shyn peıilimmen quttyqtaımyn. Bul meniń ákelik, ustazdyq tilegim! Egemendik elimizdiń eń bir jaqsy syılyǵy bul «Serper» jastar syılyǵy.
Erlan Bilál,M.Áýezov atyndaǵy Qazaqtyń memlekettik akademıalyq drama teatrynyń akteri, QR eńbek sińirgen qaıratkeri:
- Erkebulan men Almas teatrymyzdyń jas akterleri. Teatrǵa jumysqa qabyldanǵan sátten úlken-úlken súbeli jaqsy rolderge ıe boldy. Atap aıtsaq: M.Áýezovtiń «Abaıyndaǵy» Aıdar, «Eńlik-Kebektegi» Kebek syndy rolder. Ózderine júktelgen jaýapkershilikti kásibı turǵydan úlken deńgeıde alyp shyǵyp, teatrymyzda ujymnyń aldynda ózderiniń bet-bederlerin joǵaltpaı, júktelgen jaýapkershilikti joǵarǵy deńgeıde alyp shyqqan akterlerimiz.
«Serper» syılyǵyn jumystaryna, rolderine, tabandy eńbegine baılanysty alyp otyr dep bilemin. Shyn júrekten quttyqtaımyn! Teatrymyzdyń tuǵyrly bıikterinen kórinetinderine senimimiz mol. Búgingi jetken jetistikteri tek bastamasy dep oılaımyn. Bastaryndaǵy baqytty kúnder baıandy bolsyn!
Alma Kákisheva, M.Áýezov atyndaǵy Qazaqtyń Memlekettik akademıalyq drama teatrynyń rejıseri:
- Erkebulan Daıyrov pen Almas Shaıahmetovtyń «Serper» Jastar syılyǵynyń laýreaty atanyp jatqany úlken qýanysh. Teatrǵa kelgen bes-alty jyldyń ishinde ózderiniń jan-jaqty daryndy artıs ekenderin kórsetti. Erkebulannyń M.Áýezovtiń «Abaıyndaǵy» Aıdary. R.Otarbaevtyń «Beıbarys Sultanyndaǵy» Qalaýyn beıneleri jaqsy shyqqan rolderi ekeniń atap ótken jón. Aıdar rolin Almas ekeýi eki quramda oınaıdy. Ekeýiniń de ózindik ınterpretasıasy bar. Bıylǵy jyl Erkebulanǵa tabysty jyl boldy. Tanymal kıno rejıseri A.Sataevtyń «Volokalamsk tas joly» fılminde qazaqtyń batyry Baýyrjan Momyshulynyń rolin somdady. Atalmysh fılm óziniń deńgeıinde shyǵa jatar, biraq soǵan batyly baryp oınap shyqqanynyń ózi erlik dep oılaımyn
Almas birneshe spektáklderde basty rolderde oınaıdy. Sonyń ishinde akterdiń oń janbasyna kelgeni N.Orazalınniń «Shyraq janǵan tún» Tańat beınesi. Bul jerde Almastyń plasıkasy, daýsy jalpy akterlik sheberliginiń shyndalyp kele jatqandyǵy kórinedi.Eki akterimiz bizdiń teatrdyń bolashaǵy. Bolashaqta úlken rolderge baratyn, teatrymyzdyń bir qazyǵyn ustaıtyn jigitter dep oılaımyn. Jalpy teatrdy súıý kerek. Teatrǵa qaltyqsyz eńbek etse, ol eńbek janady. Teatrda baǵy janǵan akter, ol óziniń mısıasyn oryndaǵan akter deýge bolady. Bolashaqta Ánýar Moldabekovtiń, Asanáli Áshimovtiń izin jalǵastyratyn akterler bolady dep senemin.
Jalǵas Tolǵanbaı, M.Áýezov atyndaǵy Qazaq Memlekettik akademıalyq drama teatrynyń akteri:
- Erkebulan Daıyrov men Almas Shaıahmetov ulaǵatty ustaz, Qazaqstannyń halyq artısi Esmuhan Obaevtyń mektebin kórgen talantty jastar. Ekeýi de akademıa qabyrǵasynda oqyp júrip, qara shańyraq M.Áýezov atyndaǵy Qazaqtyń Memlekettik akademıalyq drama teatrynyń akterlik quramyna qabyldandy. Sodan bergi ýaqyt ishinde kóptegen basty, qosalqy rolderde oınap ózderiniń mamandyǵynyń sheberi ekenin kórsetti.
Naǵyz talantty ýaqytynda baǵalap, dáriptegenge ne jetsin! Men óz atymnan eki inimdi, eki baýyrymdy, eki áriptesimdi shyn júrekten quttyqtaı otyryp shyǵarmashylyq tabys tileımin!
Baýyrjan Manjigitov, M.Áýezov atyndaǵy Qazaqtyń Memlekettik akademıalyq drama teatrynyń akteri:
- Erkebulan Daıyrov, Almas Shaıahmetov bárimiz T.Júrgenov atyndaǵy Qazaq Ulttyq óner akademıasyn teteles bitirgen akterlermiz. Qara shańyraq teatrǵa da bir jyly qabyldandyq deýge bolady. Jas bolsa da ekeýiniń tabıǵı daryny bar. Teatr salasynda ǵana emes, kıno ónerinde de ózindik qoltańbalaryn qalyptastyryp júrgen artıser. Kóp oqyp, kóp izdenedi.
Belgili teatr reformatory K.Stanıslavskıı «kishkentaı rol bolmaıdy, kishkentaı akter bolady»- dep aıtqan. Olar roldiń úlken, kishiligine qaramaı, bar yntasymen, júregimen oınaıdy. Búgingi jetistik sonyń nátıjesi dep oılaımyn.
Materıaldy daıyndaǵan Saltanat ÁBİLǴAZIEVA
Pikir qaldyrý