«Nur Otan» partıasy Tóraǵasynyń birinshi orynbasary Baýyrjan Baıbek praımerızdiń kelesi kezeńderi týraly aıtyp, Facebook jelisindegi paraqshasynda arnaıy jazba jarıalady.

«Qurmetti dostar! Ótken aptada «Nur Otan»-nyń partıaishilik saılaýynyń birinshi kezeńi aıaqtalyp, reıtıńtik daýys berý qorytyndysy jarıalandy. Oǵan «Praımerız» aqparattyq júıesinde tirkelgen partıa músheleriniń 662 687-si nemese 84,2%-i qatysty.

Ózderińizge málim, Elbasy, partıa Lıderi Nursultan Nazarbaevtyń tapsyrmasy boıynsha keminde 30% áıelder men 20% – 35 jasqa deıingi jastarǵa berilgen kvota eskerilip, Májilis pen barlyq deńgeıdegi máslıhattarǵa arnalǵan saılaýaldy partıalyq tizimder jasalady.

Sondyqtan búgin Primaries.kz portalynda qatysýshylardyń jalpy reıtıńterimen birge, áıelder men jastar arasynan túsken kandıdattardyń reıtıńteri de jarıalandy.

Partıaishilik irikteýdiń ekinshi deńgeıinde aýdandyq jáne qalalyq konferensıalar ótkizilip, onda tıisti máslıhattar saılaýlaryna arnalǵan partıalyq tizimder bekitiledi.

Sondaı-aq, osy konferensıalarda saılaýshy-delegattar jasyryn reıtıńtik daýys berý jolymen joǵary deńgeıdegi óńirlik máslıhattar men Májiliske arnalǵan partıalyq tizimderge qosý úshin úmitkerlerdi saılaıdy.

Kandıdattar aldaǵy pikirsaıystarda taǵy da baǵyn synaıdy. Respýblıkalyq mańyzy bar qalalardy qospaǵanda Májiliske úmitkerler eki ret – aýdandyq jáne oblystyq konferensıalarda pikirsaıysqa túsedi.

Praımerız erejesine sáıkes Parlamenttiń tómengi palatasyndaǵy «Nur Otan» partıasynyń qyzmettegi depýtattary oblystyq partıalyq konferensıalarda úshinshi deńgeıdegi partıaishilik irikteýge qatysa alady.

Oblystyq máslıhattarǵa partıalyq tizimder tıisti konferensıalarda, al Májiliske arnalǵan qorytyndy tizim – «Nur Otan» Sezinde bekitiledi.

Ashyqtyq pen aıqyndyqty qamtamasyz etý úshin praımerızdiń barlyq kezeńi partıanyń saıtynda, sondaı-aq BAQ pen áleýmettik jelilerde jarıalanady», – dep jazdy B.Baıbek.