Barlyq óńirdiń, qalalar men aýdandardyń ákimderi – partıa fılıaldarynyń tóraǵalary partıaishilik irikteý qorytyndysyn talqylap, qurmet gramotalaryn tabystaý úshin praımerız qatysýshylarymen kezdesti. Bul týraly partıa Tóraǵasynyń birinshi orynbasary Baýyrjan Baıbek Facebook jelisindegi paraqshasynda habarlady.

Sonymen qatar, ol 150-den astam belgili saıasattanýshylardy, qoǵam qaıratkerleri men jýrnalıserdi toptastyrǵan «Nur Otan» Jaqtastarynyń lıgasymen kezdesýde partıaishilik saılaýdy uıymdastyrý barysyn baqylaýǵa aıryqsha atsalysyp, aıqyndyǵy men ádil ótýin qamtamasyz etkeni úshin qoǵam belsendilerine alǵys aıtty.

«Bas qosýda praımerızdiń birinshi kezeńiniń qorytyndysyn egjeı-tegjeıli talqyladyq. Jaqtastar lıgasynyń aıtýynsha, «Nur Otan» praımerızi – eldiń qoǵamdyq-saıası ómirindegi eleýli oqıǵa. Bir jarym mıllıonnan astam adamdy qamtyǵan kandıdattar bir aı boıy pikirsaıystyń kórigin qyzdyryp, ıdeıalary men jobalaryn tanystyrdy, el men qoǵam úshin mańyzy zor oılaryn ashyq aıtyp, kásibı, saıası qabiletin shyńdady», – dedi ol.

«Nur Otan» partıasy Tóraǵasynyń birinshi orynbasary úrgizilgen taldaýlarǵa sáıkes, tirkelgen 10 073 kandıdattyń ishinde praımerızge barlyq deńgeıdegi máslıhattardyń 1410 qyzmettegi depýtaty qatysqanyn atap ótti. Olardyń 213-i partıaishilik irikteýdiń birinshi kezeńinen óte almaǵan. Iaǵnı praımerızden máslıhattardyń qyzmettegi depýtattarynyń úshten biri ǵana ótti.

Eń joǵary nátıjege qol jetkizgen 500-den asa qatysýshy – volonterlar, kóp balaly analar, qarapaıym pedagogtar, dárigerler, kásiporyn qyzmetkerleri jáne basqalar.

Bul rette, praımerız partıa qataryna 42 myńnan astam jańa múshelerdi tartýǵa múmkindik berdi. Olardyń 1000-nan astamy partıaishilik saılaýǵa qatysyp, árbir 4-shisi daýys berý qorytyndysy boıynsha eń joǵary reıtıńke ıe boldy.

«Osylaısha, praımerızdiń birinshi kezeńiniń qorytyndysy boıynsha «Nur Otan»-nyń barlyq deńgeıdegi máslıhattarǵa arnalǵan partıalyq tizimderi 60%-ten astam jańarady dep aıtýǵa negiz bar», – dep jazdy Baýyrjan Baıbek.

Ol óz jazbasynda Jaqtastar lıgasynyń róline erekshe toqtaldy. Onyń aıtýynsha, Jaqtastar lıgasynyń qoldaýymen túrli tártip buzýshylyqtar men aıla-amaldardyń der kezinde joly kesilip, ashyqtyq pen aıqyndyq qamtamasyz etilgen. Sondaı-aq, Jaqtastar lıgasynyń 30-dan astam múshesi praımerızge qatysý úshin partıa qataryna kirdi. Daýys berý qorytyndysy boıynsha 6 adam óz qalasy men aýdanynda alǵashqy 10-dyqqa kirip, kelesi kezeńge ótken.

«Kezdesý barysynda qyzyqty da kreatıvti usynystar tilge tıek etildi, onyń ishinde partıa jumysyn odan ári jetildirý, Jaqtastar lıgasyn ınstıtýsıonaldandyrý múmkindigi sekildi tyń usynystar bar. Sonymen birge halyqtyń ózekti máselelerin sheshýge baılanysty jumylyp isteıtin jumystardy jalǵastyrý jóninde de kelisimge keldik. Jaqtastar lıgasynda atap ótkendeı, praımerızde «utylǵandar joq, bári de ıgilikke jetti. Eń aldymen bul is-shara elimiz úshin ıgilikti boldy!» – dep túıindedi ol.