«Nur Otan» partıasy Tóraǵasynyń birinshi orynbasary Baýyrjan Baıbektiń aımaqtarǵa sapary osy aptada Ońtústik óńirde jalǵasty. Ol aldymen at basyn Túrkistanǵa tiredi.

«Memleketimizdiń Tuńǵysh Prezıdenti, Elbasy N.Á.Nazarbaevtyń osydan eki jyl buryn Túrkistandy jańǵyrtý týraly qabyldaǵan sheshimi elimiz úshin úlken tarıhı oqıǵa boldy. Túrki áleminiń mańyzdy rýhanı ortalyqtarynyń biri – kıeli kóne qala jańa mártebege ıe bolǵannan keıin alyp qurylys alańyna aınaldy. Qysqa merzim ishinde túlep, adam tanymastaı bolyp ózgerdi.

Taıaýda ǵana qaladaǵy jańa nysandardy aralaǵan kezinde Elbasy aıtqandaı, «Túrkistannyń aýqymdy qurylysy tutas óńirdiń ekonomıkalyq damýyna zor septigin tıgizip otyr». Sondaı-aq, ol turǵyndardyń ómir súrýine jaıly jaǵdaı jasaýdyń mańyzdylyǵyn da atap kórsetti. Bul tapsyrma partıanyń saılaýaldy baǵdarlamasynda kórinis tapty», - dep jazdy B.Baıbek Facebook jelisindegi paraqshasynda.

Partıa Tóraǵasynyń birinshi orynbasary Túrkistan oblysyna sapar barysynda jurtshylyqpen jáne úkimettik emes uıym ókilderimen birge «Nur Otan» partıasynyń óńirlik jáne qalalyq saılaýaldy baǵdarlamalarynyń jobalaryn talqylady.

Onyń aıtýynsha, oblys turǵyndarynan 560-tan astam usynys túsken. Onyń ishinde aýyl sharýashylyǵyn, komýnaldyq ınfraqurylymdy damytý, joldardy jóndeý jáne abattandyrý, bilim berý men densaýlyq saqtaý sapasyn arttyrý máseleleri bar. Barlyq ótinish zerdelenip, baǵdarlamany pysyqtaý kezinde eskeriledi.

Baýyrjan Baıbek budan soń bıyl mamyr aıynda sý basýdan zardap shekken Maqtaaral aýdanyna arnaıy bardy.

«Elbasy N.Á.Nazarbaevtyń bastamasymen «Birgemiz» qoǵamdyq qory Dostyq aýylynyń turǵyndaryna arnap 20 úı salýǵa 340 mıllıon teńge bólgen edi. Partıa fılıalynyń basshysy, oblys ákimi Ó.Shókeevpen birge Myrzakent kentindegi jańa qonystanýshylardy baspanalarymen quttyqtadyq. Endi bular – samannan emes, gazobloktan salynǵan kólemi 100 sharshy metrlik 4 bólmeli úıler. Sondaı-aq, qor qarjylandyrýymen Fırdoýsı aýylynyń turǵyndaryna arnap salynyp jatqan taǵy 12 úıdiń qurylysy qarasha aıynyń basynda aıaqtalady.

Memleket basshysy Q.K.Toqaevtyń úndeýine qoldaý bildirip, maqtaaraldyqtarǵa 1000 tonnadan astam gýmanıtarlyq kómek, onyń ishinde azyq-túlik, jeke gıgıenalyq zattar, kıim-keshek, tósek-oryn jabdyqtary men qurylys materıaldaryn jibergen barsha partıa múshelerine alǵysymdy bildiremin. Jigerli jastarymyz ben belsendi volonterlarymyzǵa erekshe raqmet! Sý basqan óńirde 500 jasotandyq bógetter kóterýge, azyq-túlik jetkizýge jáne basqa sharýalarǵa tikeleı kómektesti.

Qıyn-qystaý kezeńde bir birine qol ushyn berip, qoldaý kórsetý – bıik azamattyq pen jaýapkershiliktiń, qoǵam kemeldiginiń úzdik úlgisi!», - dedi B.Baıbek.