Koronavırýs ınfeksıasyn aldyn alýǵa jáne emdeýge, sondaı-aq Covid-19-dyń taralýyn boldyrmaý maqsatynda epıdemıaǵa qarsy is-sharalarǵa qatysqany úshin medısına qyzmetkerlerine ústemeaqy tóleýge áleýmettik medısınalyq saqtandyrý qoryna 154,7 mlrd teńge bólindi, dep habarlaıdy Qamshy.kz aqparat agenttigi «Áleýmettik medısınalyq saqtandyrý qory» KeAQ-nyń baspasóz qyzmetine silteme jasap. 

2020 jyldyń naýryz-qyrkúıek aılary aralyǵynda qorǵa 135,6 mlrd teńge tólendi. Shyǵyndardyń basym bóligin, ıaǵnı 81,3 mlrd teńgeni epıdemıaǵa qarsy is-sharalarǵa tartylǵan medısına qyzmetkerleriniń jalaqysyna ústeme qurady.

«Densaýlyq saqtaý mınıstrligi ortalyq deńgeıde jáne jergilikti atqarýshy organdar koronavırýstyń yqtımal ekinshi tolqynyna daıyndyq jumystaryn jalǵastyrýda. Óz kezeginde Qor koronavırýs pen pnevmonıamen aýyratyn naýqastarǵa kórsetiletin medısınalyq kómektiń ýaqytyly tólemin júrgizedi. Bul rette, osy aýrýlarmen aýyratyn pasıentterge medısınalyq kómek MÁMS júıesindegi saqtandyrylý mártebesine qaramastan kórsetiledi» dep habarlady ÁMSQ baspasóz qyzmeti.

Naýryzdan qyrkúıekke deıin provızorlyq jáne karantındik stasıonarlarǵa emdeýge jatqyzýdy qarjylandyrýǵa 24,5 mlrd teńgeden astam qarajat jumsaldy, olarda karantındik oqshaýlaý jáne qajet bolǵan jaǵdaıda 240 myńnan astam adam emdeldi.

Osy kezeńde ınfeksıalyq stasıonarlarda 72 myń pasıent emdeldi. Covid-19 jáne koronavırýstyq pnevmonıamen aýyratyn naýqastardy ambýlatorıalyq jáne stasıonarlyq jaǵdaıda emdeýge barlyǵy 18,8 mlrd teńge jumsaldy.

PTR dıagnostıkasyn júrgizýge 19 mlrd teńgeden astam qarajat bólindi. Naýryzdan qyrkúıekke deıin júrgizilgen testileý úshin Qor 10,7 mlrd teńge tóledi. PTR-testileýden elimizdiń stasıonarlarynda 222 024 qazaqstandyq, ambýlatorıalyq jaǵdaıda 708 124 adam ótti.