Praımerızdiń ekinshi kezeńi ótti. Partıaishilik irikteýdiń qysqasha qorytyndysy týraly «Nur Otan» partıasy Tóraǵasynyń birinshi orynbasary Baýyrjan Baıbek Facebook jelisindegi paraqshasynda arnaıy jazba jarıalady.

«Qurmetti dostar! Osy aptada Elbasy, partıa Lıderi Nursultan Nazarbaevtyń bastamasymen qolǵa alynǵan partıaishilik praımerızdiń ekinshi kezeńi ótti. Osy is-sharanyń qysqasha qorytyndysyn shyǵarýdy jón kórip otyrmyn.

Birinshi. Biz barlyq deńgeıdegi máslıhattarǵa arnalǵan partıalyq tizimderdi ázirleýdi aıaqtadyq. 216 máslıhatqa úmitker retinde «Nur Otan»-nyń partıalyq tizimine 6253 partıalyq endi.

Ózderińiz biletindeı, birinshi kezeńde praımerızge 10 myńnan astam kandıdat qatysty. Al 1-4 qazan aralyǵyndaǵy respýblıkalyq onlaın-daýys berýge 662 myń adam nemese barsha nurotandyqtardyń 84%-i qatysty.

Praımerızdiń ekinshi kezeńi aıasynda aýdandyq jáne qalalyq konferensıalarda elektrondy daýys berýge 4,5 myńnan astam bastaýysh partıa uıymdarynyń atynan 10 myńnan asa delegat-saılaýshy qatysty.

Barlyq konferensıa men pikirsaıystar áleýmettik jelilerde onlaın rejımde kórsetildi. Bul saılaý barysynyń ashyqtyǵy men aıqyndyǵyn qamtamasyz etti.

Ekinshi. «Nur Otan»-nyń halyqtyq tizimi jasaldy.

Taldaý kórsetkendeı, áıelderdiń úles sany 22-den 34%-ke deıin, jastar – 3,5 ese, 7-den 24%-ke deıin artty. Qazirgi qyzmet etip otyrǵan máslıhattardyń quramymen salystyrǵanda ortasha jasy 7 jasqa – 51-den 44-ke deıin jasardy.

Partıalyq tizimderdiń 24%-in qyzmettegi depýtattar quraıdy, al 76%-i – jańa tulǵalar. Bul qoǵamnyń jańarýǵa degen suranysyn qanaǵattandyrýǵa múmkindik berdi», – dep jazdy B.Baıbek.

Budan soń partıa Tóraǵasynyń birinshi orynbasary partıa qataryna qosylǵan jańa músheler týraly aıtty. Onyń aıtýynsha, partıa qataryna 42 myńnan astam jańa múshe qosylǵan. Olardyń 1000-nan astamy partıaishilik saılaýǵa qatysyp, árbir 3-shisi «Nur Otan»-nyń partıalyq tizimine endi.

«Úshinshi. Partıalyq konferensıalarda aýdandyq jáne qalalyq saılaýaldy baǵdarlamalar bekitildi.

El Prezıdenti Qasym-Jomart Toqaevtyń «Halyq únine qulaq asatyn memleket» tujyrymdamasyn iske asyrý aıasynda baǵdarlamanyń barlyq jobalary praımerız kezinde turǵyndarmen jan-jaqty talqylandy. Azamattardan túsken 17 myńnan astam usynystar men eskertýlerdiń 80%-ten astamy qabyldanǵan óńirlik baǵdarlamalarda eskerildi.

Tórtinshi. Partıanyń Májiliske arnalǵan qorytyndy tizimi 25 qarashada «Nur Otan»-nyń HH Sezinde bekitiledi.

Pikirsaıystar qorytyndysy boıynsha 723 jeńimpaz anyqtaldy, olar 14 oblystyń partıalyq tizimderine enedi. Olardyń ishinen 236 adam kelesi aptada «Nur Otan»-nyń Májiliske arnalǵan partıalyq tizimine qosylý úshin oblystyq pikirsaıystarǵa qatysady.

Qazirgi kezde elordanyń, Almaty men Shymkenttiń kandıdattary saılandy. Elektrondy daýys berý nátıjelerimen Primaries.kz saıtynan tanysýǵa bolady.

Sarapshylar qaýymy atap ótkendeı, partıa praımerızi eń bastysy – básekeli, ashyq ta aıqyn negizde jurt senim artqan bedeldi tulǵalardyń arasynan iriktelgen áleýetti depýtattar korpýsyn jasaqtaýǵa múmkindik bermek.

Osylaısha, «Nur Otan» Elbasy, partıa Lıderi Nursultan Nazarbaevtyń bıleýshi partıany «qaıta jandandyrý» aıasynda jarıalaǵan «Myqty lıderler – Myqty partıa» qaǵıdatyn naqty iske asyrdy.

Álemniń jetekshi elderinde ozyq demokratıalyq qural retinde tanylǵan praımerız qoǵamymyzda jańa saıası mádenıettiń qalyptasýyna jol asha otyryp, partıalyq-saıası júıeniń ajyramas bóligine aınalatynyna senimdimin», – dedi B.Baıbek.