Armenıanyń prezıdenti Armen Sarkıssán premer-mınıstr Pashınánnyń qyzmetinen ketýine jáne merziminen buryn saılaý ótkizýge shaqyrady. Bul týraly bbc.com habarlady. 

– Menimen kezdesýge qatysýshylardyń basym kópshiligi bir ǵana máselemen keledi. Kóbi premer-mınıstr Nıkol Pashınánnyń qyzmetinen ketýi ne ókilettiliginiń toqtatylýy jaıyn qozǵap, konstıtýsıaǵa sáıkes merziminen buryn saılaý ótkizý jaıly usynystaryn aıtty, – dep "Armenpress" basylymy prezıdent sózin jetkizdi.

Armenıa úkimeti prezıdenttiń sózine áli jaýap qatqan joq.

Armenıa – prezıdent tikeleı saıasatqa qatyspaıtyn, biraq memleket basshysy jáne konstıtýsıanyń kepili bolatyn parlamenttik respýblıka.

Buǵan deıin, Armenıa men Ázerbaıjan arasyndaǵy Taýly Qarabaq úshin bolǵan 44 kúndik soǵysta armán kúshteri 2,3 myńnan astam áskerinen aıyryldy. Sóıtip, 10 qarasha kúni Armenıa premer-mınıstri Nıkol Pashınán Ázerbaıjan prezıdenti Ilham Álıev jáne Reseı prezıdenti Vladımır Pýtın Taýly Qarabaqta áskerı áreketterdi toqtatý týraly kelisimge qol qoıdy. Sol kelisim jasalǵan kúnnen bastap Armenıada narazylyqtar men qyzý pikirtalastar jalǵasyp keledi.