«Nur Otan» partıasy tóraǵasynyń birinshi orynbasary Baýyrjan Baıbek Facebook jelisindegi paraqshasynda osy jyldyń 17 tamyzy men 17 qarashasy aralyǵynda alǵash ret respýblıkalyq partıaishilik saılaý formatynda ótken praımerızderdiń qorytyndysyn jarıalady.

«Qurmetti dostar! Elbasy, partıa Lıderi Nursultan Nazarbaevtyń bastamasymen qolǵa alynǵan «Nur Otan» partıasynyń tuńǵysh respýblıkalyq praımerızi aıaqtaldy.

Ol úsh aı boıy – 17 tamyzdan 17 qarashaǵa deıin júrdi.

Bul úsh aı úmitkerler úshin de, sol sekildi partıanyń ortalyq apparatynan bastap aýdandyq fılıaldaryna deıingi barsha qyzmetkerleri úshin de úmit pen kúdikke toly qarbalas sát bolǵany sózsiz. Osyndaı aýqymda praımerız ótkizý ońaıǵa soqpady. Dese de, partıa Lıderi men partıalastardyń, sondaı-aq Jaqtastar Lıgasynyń qoldaýynyń arqasynda biz «Nur Otan»-dy «qaıta jandandyrý» boıynsha alǵa qoıylǵan mindetterdi tıisinshe oryndap shyqtyq.

İrikteý prosesiniń ashyqtyǵy men aıqyndyǵynyń arqasynda praımerızge degen jurt qyzyǵýshylyǵy osy kezeń ishinde tolas tappady. Daýys berýdiń birinshi kezeńine 662 myńnan asa adamnyń, ıaǵnı barsha nurotandyqtardyń 84%-niń qatysýy – osynyń aıǵaǵy. Praımerızge qatysqan 10 myń úmitkerdiń árqaısysynyń óz jaqtastary men baqylaýshylary boldy. Bul atalǵan is-sharaǵa 1,5 mıllıondaı qazaqstandyqty tartýǵa múmkindik berdi.

Partıaishilik irikteý el ishindegi belsendi de talantty jandardyń ózderin kórsetip, ıdeıalaryn tanystyrýyna, jańa jaqtastar men dostar tabýyna jol ashty. Sonymen, ekinshi kezeńniń qorytyndysy boıynsha 6253 adam «Nur Otan»-nyń barlyq deńgeıdegi 216 máslıhatqa arnalǵan partıalyq tizimderine endi.

Kúni keshe ǵana praımerızdiń úshinshi kezeńi aıaqtaldy. «Nur Otan»-nyń Qazaqstan Respýblıkasy Parlamentiniń Májilisine arnalǵan partıalyq tizimine 17 óńirden kandıdattar anyqtaldy.

Pikirsaıystar qorytyndysy boıynsha 267 úmitkerdiń ishinen jasyryn reıtıńtik elektrondy daýys berý arqyly 78 adam saılandy.
Onyń ishinde 9 kandıdat – praımerızge qatysý úshin qatarymyzǵa qosylǵan partıanyń jańa músheleri. Partıalyq tizimge Májilistiń qyzmettegi depýtattarynan 5 adam endi.

Partıalyq tizimniń úshten birine jýyǵyn áıelder qurasa, al 12 kandıdat – 35 jasqa deıingi jastar. Jeńimpazdardyń ortasha jasy – 47 jas.

Olardyń 27%-ti – shaǵyn jáne orta bıznes ókilderi, 24,5%-ti – ekonomıser, 11,5%-ti – zańgerler, al 6 kandıdattyń ǵylymı dárejesi bar. Ásirese, ónerkásip, memlekettik basqarý, bilim, densaýlyq saqtaý, sondaı-aq úkimettik emes sektordyń ókilderi basymdyqqa ıe.

Osy oraıda praımerızde top jarǵandardy quttyqtaı otyryp, Elbasy, partıamyzdyń Lıderiniń bastamasyna qoldaý bildirip, saıası dodada baq synaǵan 10 myń qatysýshynyń árqaısysyna shynaıy alǵys bildiremin!

Qymbatty dostar, sizderdiń arqalaryńyzda praımerız partıalyq «áleýmettik lıft» arqyly talantty da belsendi, el taǵdyryna alańdaıtyn azamattardy jaýapty isterge aralastyrýdyń pármendi quralyna aınaldy. Munda eshkim de utylǵan joq. Bári de ıgilikke jetti. Ásirese, elimiz úshin ıgi is boldy! Partıalyq tizimder boıynsha saılaý júıesin engizý aıasynda biz bárimiz birge elimizde jańa saıası mádenıetti qalyptastyrýǵa jol ashtyq.

Oń tájirıbeni eskere otyryp, partıa Lıderi Nursultan Nazarbaev «Nur Otan»-nyń Jarǵysyna partıanyń praımerız – partıaishilik saılaýyn ótkizýi týraly normany engizýdi tapsyrdy. Jarǵyǵa engiziletin ózgeristerdiń tıisti jobasy bıylǵy 25 qarashada ótetin partıanyń kezekten tys HH Seziniń bekitýine shyǵarylady.

Bul rette Elbasy bastamashylyq etken «Senim. Dıalog. Bolashaqqa nyq qadam» partıany «qaıta jandandyrý baǵdarlamasy óz tıimdiligin kórsetkenin naqty aıtýǵa bolady.

Zaman alǵa tartqan talaptardy ýaqtyly eskere otyryp, «Nur Otan» tek jańaryp qana qoımaı, básekelestik negizde jurt qoldaýyna ıe bolǵan partıalyq tizimdi qalyptastyrdy. Sondaı-aq, árbir aýdan, qala jáne óńir boıynsha halyq pikiri barynsha eskerilgen 216 saılaýaldy baǵdarlamany qabyldady.

Biz bekem birlik pen berekeli tirlikke súıene otyryp qana elimizdi órkendetemiz! #BizBirgemiz», – dep jazdy Baýyrjan Baıbek.